Instituti i Statistikave, ka publikuar raportin për Produktin e Brendshëm Bruto të vitit 2023, së bashku me ato gjysmëfinale të 2024-s.
Sipas këtij raporti, në 2024, ekonomia shqiptare shënoi një rritje prej 4.05% në terma të përgjithshme, krahasuar me vitin 2023.
Peshën më të madhe të ekonomisë për vitin 2024, e zuri sektori i shërbimeve me 48.69%. Kjo kategori, pësoi rritjen prej 6.51% krahasuar me vitin 2023.
Vendin e dytë e zë ndërtimi me 11.92%, duke shënuar rritjen prej 4.52% në 2024, krahasuar me atë të vitit 2023.
Ulje ka shënuar sektori i industrisë në 2024. Duke zënë 10.48% të PBB-së, industria pësoi uljen prej 4.55% krahasuar me vitin 2023. Nuk mbetet pas as bujqësia, pyjet dhe peshkimi, duke shënuar uljen prej 2% në 2024, pasi përbën 15.45% të PBB-së.
Kush ka kontribuar më shumë në ekonominë e vitit 2024?
Sipas raportit, kryeson “Administrata publike, arsimi dhe shëndetësia” me 1.20%. Më pas vijnë “Tregtia, transporti, akomodimi dhe shërbimi ushqimor” me 1,02%, e së treti “Ndertimi” me 0,53%.
Kontribut negativ ka pasur nga ana e “Bujqësisë, pyjet dhe peshkimit”, me -0.32% dhe “Industria” me -0.52%.
Sakaq, rritjen reale të ekonomisë në vitin 2024, e kanë dhënë “Taksat neto mbi produktet”, duke kontribuar me 1,26%.
Shpenzimet
Shpenzimet më të larta të ekonomisë u bënë për konsumet finale, duke zënë peshën e 81.93%. Konsumet finale u rritën me 4.02% krahasuar me vitin 2023.
Nga totali i përqindjes së konsumit final, 84,11% e zë konsumi i popullatës, 15,16% konsumi i administratës publike dhe 0,73% konsumi i institucioneve në shërbim të familjeve (IJFSHF).
“Eksportet e mallrave dhe shërbimeve” u rritën me 0,11% ne terma realë, ndërkohë “Importet e mallrave dhe shërbimeve” u rritën me 5,99%, krahasuar me vitin 2023.
Të ardhurat
Fitimi operativ bruto, i cili shpreh vlerën që mbetet pas zbritjes nga vlera e shtuar të kompensimit të punonjësve dhe taksave neto në prodhim, përbën peshën kryesore të të ardhurave në ekonomi me 61,49%.
Sipas INSTAT, kompensimi i punonjësve, zë 29,39% të PBB-së, i ndjekur nga taksat mbi produktet me 13,48%.
Fitimi operativ bruto, në raport me vlerën e shtuar bruto, zë 55,50 % në vitin 2024 nga 59,32 % që zinte në vitin 2023.
