Administrata e presidentit amerikan Donald Trump ka rritur tensionet me Rezervën Federale, duke kërcënuar me aktakuzë penale kryetarin Jerome Powell.
Shkak u bënë komentet e tij në Kongres mbi një projekt rinovimi prej 2.5 miliardë dollarësh, por Powell e cilësoi këtë si një “pretekst” për të ushtruar më shumë ndikim mbi politikat e interesave.
Powell, i emëruar nga Trump në vitin 2018, përfundon mandatin në maj, por nuk është i detyruar të largohet. Analistët e shohin këtë lëvizje si një shtysë që ai të qëndrojë në detyrë, shkruan Reuters.
Ky zhvillim vjen pak para se Gjykata e Lartë të shqyrtojë përpjekjen e Trump-it për të shkarkuar guvernatoren Lisa Cook.
Investitorët i kanë ndjekur me shqetësim përplasjet mes Trump dhe Fed që prej zgjedhjes së tij për një mandat të dytë në nëntor 2024, me premtimin për të përmirësuar përballueshmërinë për amerikanët pas një periudhe inflacioni të lartë.
Tregjet e aksioneve të SHBA-ve ranë rreth 0.5% para hapjes së së hënës, dollari u dobësua, ndërsa obligacionet e thesarit mbetën pothuajse të pandryshuara.
“Këto zbulime shënojnë një përshkallëzim dramatik në përpjekjen e administratës për të minuar Fed-in, dhe mund të sjellin pasoja të paqëllimshme që shkojnë drejtpërdrejt kundër synimeve të deklaruara të presidentit Trump,” tha Karl Schamotta, strategu kryesor i tregut në Corpay, Toronto.
Ekspertët paralajmërojnë se ndërhyrja e administratës në pavarësinë e Fed mund të sjellë pasoja të paparashikuara për ekonominë amerikane. Historiani Peter Conti-Brown e quajti hetimin ndaj Powell “një pikë të ulët në presidencën e Trump dhe në historinë e bankës qendrore amerikane.”
