Në një rrëfim të hapur dhe të ndjerë për “Grida Duma Podcast”, Egli Tako ka ndarë perceptimet e saj mbi dashurinë, shoqërinë, dinamikat e çifteve, eksperiencën në Big Brother VIP dhe botëkuptimin që ka sot.
Ajo shpjegoi se realiteti brenda asaj shtëpie është i papërshkrueshëm për këdo që s’e ka provuar vetë. “Në momentin që futesh aty brenda, s’e ke idenë nëse bota jashtë vazhdon të rrotullohet”, rrëfeu ajo, duke shtuar se i kishte premtuar besnikëri të dashurit të saj dhe se ishte e vendosur të mos tërhiqej, pavarësisht se e dinte që opinioni publik po e kritikonte.
Gjatë bisedës, Egli analizoi edhe vizionin bashkëkohor mbi dashurinë.
“Njerëzit sot kanë harruar të dashurojnë individin, nuk i kushtojnë më vëmendje të mirëfilltë. Në një raport, femrës i takon të jetë më e ledhatuara. Në çift, partnerja duhet të ndihet si princeshë, jo burri. Ky është një parim që duhet ta ndajë edhe mashkulli, pasi do ta bënte atë më të kompletuar,” u shpreh ajo, teksa kritikoi qasjen materialiste të disa djemve që synojnë të magjepsin femrat me pasuri, në vend që të ndërtojnë një lidhje autentike.
Ajo zbuloi gjithashtu arsyen që e shtyu të largohej nga fiziku tejet muskuloz që kishte arritur me stërvitje në palestër.
“E admiroj trupin që kam tani, më delikat dhe më grua,” deklaroi ajo.
Sa i përket anës sentimentale, Egli nuk e fshehu se i mungon prania e një personi të dashur, veçanërisht gjatë fundjavave, por pohoi se nuk do të kënaqej me një marrëdhënie që nuk i sjell lumturi.
