Përdorimi i energjisë në mënyrë me racionale është një aksion shumëdimensional e cili kërkon përfshirjen e të gjithë aktorëve që luajnë rol në prodhimin, menaxhimin, shfrytëzimin dhe shpërdorimin e energjisë. Të përdorësh energjinë në mënyrë me efiçente do të thotë të ulësh nevojën për energji elektrike pa ndikuar në jetët tona.
Edhe më emergjent bëhet përdorimi me efiçencë i energjisë elektrike në kushtet e një krize të thellë botërore, ku çmimi i energjisë elektrike është rritur në mënyrë eksponenciale, duke arritur në nivele historike rekord.
Agjencia për Efiçencën e Energjisë do të nxisë në çdo sektor masa për përmirësimin e efiçencës së energjisë me synimin garantimin e një cilësie jetese më të mirë për të gjithë qytetarët shqiptarë
Si mund të arrihet kjo gjë? Duke ndërmarrë disa hapa të thjeshtë çdo ditë, si individë dhe si shoqëri, dhe duke zbatuar politika të qëndrueshmërisë energjitike në sektorë të ekonomisë si industria, ndërtimi, transporti dhe bujqësia.
Koncepti i ndërtesës me afër zero energji po gjen gjithmonë e më shumë terren në fushën e ndërtimit. Këto ndërtesa kombinojnë kursimin e energjisë me prodhimin e energjisë së ripërtëritshme dhe konsumojnë pothuajse aq energji sa arrijnë të prodhojnë. Ato paraqesin një alternativë mjaft interesante dhe të leverdishme, veçanërisht në ndërtesat individuale.
Ndriçimi ambjeteve me llampa LED, përdorimi i pajisje elektrike me efiçencë të lartë, vendosja e termoizolimit të duhur, dritareve termike, si dhe panelet fotovoltaike për prodhim ujë të ngrohtë dhe energji elektrike janë disa nga masat e mara që e bëjnë një ndërtesë të zvogëlojë shpenzimet dhe faturën e energjisë elektrike
Transporti publik dhe privat është ndotësi kryesor i prodhimit të gazrave serë. Nxitja e përdorimit të automjeteve të transportit urban elektrik, si dhe atyre individuale është alternativa e duhur për një ambjent të pastër.
Progresi drejt efiçencës së energjisë kërkon një ndryshim rrënjësor të mënyrës tonë të jetesës dhe atyre që mund të konsiderohen zakonet tona. Por nuk mund të bëjmë dot ndryshe nëse duam që të kemi një të ardhme të sigurt për veten dhe fëmijët tanë.
