Deputeti i Partisë Demokratike, Eduart Selami, është takuar dje me ambasadorin e SHBAve në Tiranë, Donald Lu, në një nga kafet pranë ndërtesës së ambasadës amerikane në kryeqytet. I pyetur nga “Gazeta Shqiptare”, Selami konfirmoi takimin për të cilin pohoi se ishte i parashikuar më parë dhe ishte konfidencial. “Po, është e vërtetë që jam takuar sot (dje) me ambasadorin Lu në afërsi të ambasadës. Takimi ishte planifikuar më parë. Sa i përket temës së diskutimit, mund t’ju them vetëm që ishte konfidencial”, – pohoi Selami për “GSH”. Takimi i tij me diplomatin amerikan vjen vetëm pak ditë pas qëndrimit disaditor që Selami zhvilloi në SHBA. Që andej, në një intervistë për “Zërin e Amerikës”, ai shprehu kritika të forta ndaj lidershipit të Partisë Demokratike.
KRITIKAT / Selami pohoi se ka mbetur i zhgënjyer bashkë me shumicën e shqiptarëve, pasi ky lidership nuk ngjall besim dhe shpresë. “Qeveria ‘RamaMeta’ është më e keqja e viteve të fundit, mirëpo opozita akoma nuk ofron alternativë dhe nuk ngjall shpresë. Kjo për shkak të lidershipit të PDsë. Ai nuk ngjall shpresë, ndaj edhe kjo qeveri rri në këmbë në një kohë kur shqiptarët largohen për azil ekonomik në vendet e BEsë”, – tha Selami. “Lidershipi i PDsë më ka zhgënjyer mua dhe një pjesë të mirë të demokratëve”, – vijoi më tej ai. “Është bërë një analizë e përgjithshme. Nuk është bërë një analizë e thellë. U përsëritën gabimet e zgjedhjeve të mëparshme. Lidershipi i PDsë nuk ka ngjallur shpresë dhe besim. Lidershipi i PDsë më ka zhgënjyer edhe mua dhe shumicën e demokratëve që nuk arritën objektivin ndaj kësaj keqqeverisjeje. Kjo qeveri është thellësisht e korruptuar dhe e pafat për të drejtuar vendin”, – deklaroi Selami.
