Eduard Ndocaj, nënkryetari i PDK-së, njëherësh një nga kandidatët për t’u bërë deputet i Lezhës pas dorëheqjes së Arben Ndokës dhe arrestimit të Armando Prengës, ka kritikuar ashpër kreun e ALUIZNI-t Artan Lame.
Sipas Ndocajt, shkrimi i Lames në lidhje me pllakatën e sultan Sulejmanit në Kalanë e Lezhës është një ofendim i rëndë për gratë lezhjane. Për këtë arsye, i ashtuquajturi “kaubojsi i Lezhës” e ka shpallur Artan Lamen person “non grata” në Lezhë.
“Artan Lame ka ofendur rënde gratë e lezhjanëve e gjithë shqiptarët. Nga sot ai është person i padëshiruar në Lezhë. Ai do të jetë i dëshiruar vetem kur të vijë në Lezhë e të kërkojë të falur grave lezhjane duke qarë para varrit të Gjergj Kastriotit, shpëtimtarit të kombit shqiptar,” thotë Ndocaj.
Një ditë më parë Lame shkruante me ironi se:
“Po bëhet një javë që të gjithë patriotët e stadiumeve i janë lëshuar pllakës së Sulejmanit, duke harruar që gjithë gratë e tyre çdo pasdite kselhasen e qajnë duke parë telenovelat me Sulejman…
Thjesht ditën që do thyejmë pllakën (dhe ju garantoj që do e thyejnë), do kemi një dëshmi më pak të faktit që në këtë vend kanë banuar njerëz asokohe e jo vetëm çakej pylli e arinj mali.
Dhe në fakt, veçanërisht muajt e fundit, asej ane na kanë ardhur plot raste dijetarësh që po i bëjnë nder edhe Tiranës”.
