De Biazi: Kosova nuk na i merr lojtarët
Xhani De Biazi nuk dëshiron të flasë për ndeshjen e Shqipërisë ndaj Serbisë në mediat kosovare, edhe pse kjo sfidë është te dera dhe nga rezultati i saj varen shumë fatet e kualifikimit të kuqezinjve në finalet e “Euro 2016”. I pyetur nga gazeta “Zëri” e Kosovës, megjithatë, trajneri i kuqezinjve ishte i hapur të flasë për futbollin e Kosovës.
Italiani me pasaportë shqiptare i është gëzuar vendimit që vitin tjetër të vihet në votim kërkesa e Kosovës për pranim në UEFA, ndërsa shprehet optimist se, më në fund, edhe ky sport kosovar do të ndërkombëtarizohet. “Besoj se kjo do të ndodhë. Është një urim që ia bëj Federatës së Futbollit të Kosovës. Mendoj se është e drejtë që edhe Kosova ta ketë një përfaqësuese e pjesëmarrje në kompeticione të rëndësishme”, – u shpreh De Biazi.
Ai është i bindur se Kosova nuk do t’ia marrë kombëtares kuqezi lojtarët kosovarë, të cilët mbajnë barrën kryesore në ekipin që drejton. “Në këtë drejtim ka mjaft bashkëpunim, koordinim dhe mjaft respekt mes palëve. Askush s’do të bëjë “lojëra” të çuditshme ndaj tjetrit. Ata lojtarë kosovarë që janë tashmë me ne, janë praktikisht me ne dhe bëjnë pjesë në projektin tim”, – ka deklaruar De Biazi.
Pra, mund të largohen ata që duan, duke përmendur si shembull rastin e Samir Ujkanit. “Por, është e qartë se, nëse është dikush që dëshiron të ndryshojë ambient, mendoj se nuk do të ketë probleme. Këtë e ka bërë Ujkani, ishte me ne dhe nuk bënte pjesë më në projektin tonë, ndaj ka shkuar me kombëtaren e Kosovës. Ata që nuk do të bëjnë pjesë në planet e Shqipërisë mund ta konsiderojnë Kosovën, këtu nuk ka diskutim, është normale”, – thotë De Biazi, i cili beson se Kosova do t’i afrojë talentët e së ardhmes, të cilët nuk luajnë ende për përfaqësuese të tjera:
“Unë kam biseduar personalisht me drejtuesit e FFK-së dhe më kanë thënë se Kosova nuk e ka ndërmend t’i marrë lojtarët që kanë luajtur për Shqipërinë. Mendoj se në këtë pikë nuk do të ketë probleme. Mendoj se Federata e Kosovës dëshiron të bëjë një projekt me lojtarë të rinj, me perspektivë, për të ardhmen.”
De Biazi beson në grupin e lojtarëve që ka në dispozicion dhe thotë se nuk i duket e drejtë që t’i shkaktojë kokëçarje FFK-së. “Por, nëse ndonjë lojtar do të na interesonte ne, do ta shqyrtonim këtë mundësi”, – pohon ai. Sa i përket një miqësoreje eventuale ndërmjet Shqipërisë dhe Kosovës, De Biazi e sheh mjaft të vështirë një gjë të tillë, pasi thotë se ndeshjet planifikohen shumë më herët dhe është problematike të ndodhë kjo.
