Portalet kryesore sportive rumune i kanë dhënë jehonë tifozerisë shqiptare. Mediat rumune shkruajnë se tifozët shqiptarë do të jenë më të shumtë në numër gjatë ndeshjes së sotme, Shqipëri-Rumani. Ato shkruajnë se që në orët e para të mëngjesit, qyteti është pushtuar nga ngjyrat kuqezi.
“Nëse ndaj Francës e Zvicrës fituam betejën e tifozëve, një gjë e tillë nuk do të ndodhë ndaj Shqipërisë”, shkruan “gsp.ro”, e cila ka përshkruar atmosferën në rrugët e Lionit dhe se si kudo dominojnë ngjyrat kuqezi.”Shqiptarët bëjnë spektakël në rrugët e Lionit”, shkruhej në këtë artikull.
Sipas kësaj gazete, janë shitur të gjitha biletat e ndeshjes për stadiumin që ka kapacitet prej 60 mijë tifozësh. Ajo parashikon që në stadium të jenë vetëm 10 mijë tifozë rumunë ndërsa 30 mijë tifozë do të jenë të veshur kuqezi.
