Marcelo ka treguar dallimin në mes të Jose Mourinhos dhe Zinedine Zidane. Trajneri i Manchester Unitedit, Jose Mourinho ka thënë se falë tij Real Madrid është bërë skuadër e madhe, duke e dërguar tre vite radhazi në gjysmëfinale të Ligës së Kampionëve.
Portugezi tha se para se të shkonte ai në Real në vitin 2010, spanjollët nuk luanin as në çerekfinale të Ligës së Kampionëve. Por, pak orë më vonë, Marcelo është tallur me Mourinhon, ku ka treguar dallimin e tij me Zinedine Zidane.
“I vetmi dallim në mes të Madridit të Mourinhos dhe atij të Zidane janë titujt”, tha Marcelo gjatë konferencës për media.
Gjatë tre viteve në Real, Mourinhoi fitoi një La Liga, një Copa del Rey dhe një Superkupë të Spanjës, ndërsa Zidane për një sezon e gjysmë fitoi dy Liga të Kampionëve, një La Liga, Një Superkupë të Evropës dhe një Kupë të Botës për Klube, ndërsa deri në fund të këtij viti ka mundësi t’i fitojë edhe tre tituj të tjerë, përgatiti ”Express”. (b.an)
