Presidenti amerikan Donald Trump ka paralajmëruar se Bashkimi Europian dhe Britania e Madhe mund të jenë subjekte të tarifave të rritura nga SHBA-ja. Trump ka dhënë një sërë arsyesh për vendosjen e tarifave, siç janë siguria kufitare, drogat dhe deficiti tregtar.
“Tarifat mbi eksportet e Bashkimit Evropian në SHBA do të ndodhin shumë shpejt”, tha ai duke shtuar se vendet evropiane nuk marrin makinat apo produktet tona bujqësore nga SHBA. “Ata nuk marrin pothuajse asgjë nga ne”, u shpreh Trump.
Taksa e importit prej 25% për mallrat nga Kanadaja dhe Meksika, dhe 10% për mallrat nga Kina, fillon të martën, ndërsa presidenti amerikan njoftoi se këtë të hënë do të zhvillojë bisedimke me liderët e dy vendeve fqinje. Ai paralajmëroi tarifa edhe për mallrat nga Mbretëria e Bashkuar, ndërkohë që kryeministri britanik, Keir Starmer shkon në Bruksel për t’iu bashkuar një takimi të liderëve të Bashkimit Evropian.
Një zëdhënës i Komisionit Evropian tha se Unioni do të përgjigjet me vendosmëri ndaj çdo tarife të padrejtë ose arbitrare mbi eksportet e saj. “Keqardhje për tarifat e vendosura ndaj Kanadasë, Meksikës dhe Kinës. Ato krijojnë përçarje të panevojshme ekonomike dhe janë të dëmshme për të gjitha palët.”- shtoi zëdhënësi i BE-së.
Më herët Kandaja dhe Meksika thanë se do t’i përgjigjen masave të Trumpit me sanksione dhe tarifa të ngjashme, ndërsa Kina tha se do t’i padisë Shtetet e Bashkuara në Organizatën Botërore të Tregtisë.
