Ndërsa e gjithë klasa politike në Shqipëri tentoi që të shiste në publik fotot e takimit me ish-kryetarin e Bashkisë së New York-ut, Rudi Giuliani, njëkohësisht dhe këshilltar personal i presidentit të SHBA, Donald Trump, arsyeja e vërtetë e kësaj vizite nuk lidhet me interesat e shqiptarëve.
Por, fokusi i tij i vërtetë për vizitën në Tiranë, kanë qenë muxhahedinët.
Ai është takuar në kryeqytetin shqiptar me Maryam Rajavi, e cila është drejtuesja e rreth 2 mijë muxhahedinëve që janë strehuar në Shqipëri.
Mësohet se ata diskutuan mbi regjimin në iran dhe nevojën për të adoptuar një politikë vendimtare kundrejt regjimit atje.
Rudy Giuliani vlerësoi kryengritjen e fundit të popullit iranian dhe tha se roli i MEK-ut në organizimin e protestave – që detyroi udhëheqësin dhe presidentin e regjimit të pranonte atë – tregon për potencialin dhe aftësitë e rezistencës iraniane për ndryshim në Iran.
Ai nënvizoi mbështetjen e tij për Rezistencën iraniane të udhëhequr nga Maryam Rajavi për ndryshimin e regjimit dhe krijimin e lirisë dhe demokracisë në Iran.
Këshilltari personal i presidentit të SHBA, Donald Trump, Rudi Giuliani mori pjesë dhe në një takim të madh të zhvilluar te Pallati i Kongreseve me muxhahedinët.
Por vizita e tij lidhet edhe me një aspekt tjetër.
MEK ka shprehur shqetësimin kohët e fundit se agjentë të shërbimit sekret iranian po kamuflohen përmes shoqatave të ndryshme kulturore dhe po organizohen për eliminimin e anëtarëve të saj shkruan Tema.
Në një email të shpërndarë nga MEK një javë më parë për mediat, thuhej se Ministria e Inteligjencës iraniane dhe agjentët e tij në ambasadën iraniane në Shqipëri, po punojnë nën maskën e aktiviteteve kulturore në Teheran dhe Tiranë, duke përdorur mercenarët e tyre të njohur për shpifje dhe përhapjen e informacionit të rremë kundër Rezistencës Iraniane dhe Organizatës së Muxhahedinëve të Popullit të Iranit (PMOI / MEK) në Shqipëri:
“Ndërsa regjimi i Mullahëve është i rrethuar nga kryengritjet, protestat dhe sulmet në të gjithë vendin, e ndjen më shumë se kurrë të domosdoshme të komplotojë kundër opozitës kryesore të tij.
Një nga shembujt e fundit ishte mbajtja e takimeve më 5 dhe 6 mars 2018 në Teheran, për të përkujtuar Naim Frashërin, poetin e fundit të shekullit të XIX nga Shqipëria.
Ministria e Inteligjencës së regjimit (MOIS) dhe ambasada sollën një numër shtetasish shqiptarë dhe ballkanas si akademikë dhe gazetarë për të marrë pjesë në këto takime”./a.m.
