Shkëndija, kampione e Maqedonisë së Veriut ose Drita, kampione e Kosovës, do të ketë mundësinë të luajnë në fazën e grupeve të një kompeticioni europian.
Një nga këto dy klube shqiptare, sipas shortit të UEFA-s, do të jetë në grupe. Por si ndodh kjo?!
Shkëndija dhe Drita, luajnë në turin e dytë të Champions League, ku përballen me dy ekipe të mëdha, si FCSB nga Rumania dhe Copenhagen nga Danimarka.
Në rast eliminimi në turin e dytë të Champions League, dy skuadrat shqiptare do të zbresin në turin e tretë të Europa League, aty ku shorti i ka vendosur përballë njëra-tjetrës.
Ekipi që del fitues, do të kualifikohet në “play off” të Europa League, ndërsa humbësi bie në “play off” të Conference League.
Në këtë situatë, skuadra që kualifikohet në “play off” të Europa League, në rast fitoreje shkon në grupet e këtij kompeticioni, ndërsa në rast humbje do të shkonte direkt në grupet e Conference League, sipas rregullores së UEFA-s.
Në rast se Drita ose Shkëndija, ia dalin të kalojnë turin e dytë në Champions League, do të vazhdojnë rrugëtimin në këtë kompeticion, diçka që gjithashtu ua siguron fazën e grupeve të një turneu europian.
