Derbi i ditës së premte do të rikthejë sërish përballë, për të tretën herë këtë sezon, Tiranën dhe Partizanin. Pas dy fitoreve të ekipit të kuq në dy fazat e para, bardheblutë do të provojnë që të prishin një mallkim që zgjat prej pesë vitesh, që kur goli i Gilbertos vendosi për Tiranën më 7 shkurt 2014.
Por, si mbërrijnë këto dy skuadra në këtë supersfidë? Nëse marrim renditjen, atëherë nuk duhet të ketë histori. Tirana-Partizani njësoj sikur të luhej Inter-Juventus, duke bërë një krahasim me Serinë A italiane. Në fakt, pikët e diferencës mes “Zonjës” dhe zikaltërve janë 22, ndërsa të kuqtë qëndrojnë 21 pikë mbi bardheblutë në renditjen e Superiores. Megjithatë, në të tilla ndeshje, si kur flasim për Inter-Juventus, ashtu edhe për Tirana-Partizani, klasifikimi vlen shumë pak.
Por, le të bëjmë një bilanc se si mbërrijnë këto dy skuadra në këtë sfidë të rëndësishme. Viti 2019 ka nisur jo aq mirë për bardheblutë, që pësuan humbje në Vlorë, përballë Flamurtarit, në sfidën e kthimit në Kupën e Shqipërisë.
Megjithatë, në sajë të fitores 2-0 në Tiranë arritën kualifikimin, kështu që nuk ndikoi në objektivat finalë. Në kampionat, bardheblutë kanë grumbulluar 14 pikë në gjashtë ndeshje, pra katër më pak nga 18 pikët në dispozicion.
Me 4 fitore dhe 2 barazime, skuadra e Memës qëndron më lart se Partizani i Gegës, që ka luajtur vërtet pesë ndeshje, por ka totalizuar një humbje mes tyre, atë ndaj Laçit. Më pas, katër fitore dhe 12 pikë. Të kuqtë kanë pasur dy ndeshje në Kupë, duke i fituar dhe shënuar plot shtatë gola ndaj Kastriotit, që e kanë mundur edhe në kampionat 2-0.
Si Tirana, ashtu edhe Partizani kanë mundur 1-0 Skënderbeun në Korçë, ndërsa edhe Flamurtarin brenda në shtëpi. Bardheblutë kanë barazuar ndaj Luftëtarit dhe Teutës, në “Selman Stermasi” dhe kjo ka bërë që të mos grumbullojnë pikë të plota.
/a.rada
