Sot është dita e dytë që prej fillimit të pandemisë së koronavirusit në vendoin tonë që të moshuarit kanë të drejtë të dalin nëpër rrugë. Kjo si pasojë e masave për ruajtjen e tyre, pasi kjo kategori është ndër më të rrezikuarit nga COVID-19. Për këtë arsye kryeministri Edi Rama i ka përshëndetur sot me anë të një reagimi në faqen zyrtare, ku shkruan disa prej shumë të mirave që kjo kategori i ka sjellë vendit tonë në veçanti.
“Sa shumë mund e dashuri në rritjen e fëmijëve dhe fëmijëve të fëmijëve. Sa shumë punë e mund për familjen dhe për Shqipërinë. Sa shumë sakrifica e po aq modesti e mirëkuptim në pranimin e tyre. Sa shumë shembuj qytetarie prej tyre e sa shumë borxhe për ta sot e gjithmonë”, shkruan kryeministri Rama në rrjetin social “Facebook”.
Ndërkohë që gjithë vendi është vendosur në një karantinë totale prej orës 17:30 të ditës së premte deri në orën 05:00 të ditës së hënë, Kryeministri lajmëroi sërish këtë të shtunë një fashë orare kushtuar vetëm pensionistëve.
Deri në orën 11:00, pensionistët lejohen të lëviznin për shëtitje, por gjithmonë duke zbatuar disa masa në kuadër të ruajtjes së distancës sociale. /e.s/
