Në shtator të 2020-ës u deshën 5 orë negociata me policinë, që 31-vjeçari Elton Metaj të lëshojë nga duart kallashnikovin që i kishte vënë vetes duke kërcënuar se do të vetëvritej, në oborrin e shtëpisë së ish-bashkëshortes së tij, pasi i kishte terrorizuar familjarët. Por mbrëmjen e këtij 10 shtatori, nga arma automatike dolën plumba që i morën jetën nënës së vajzës së tij, Sabrina Bengaj, 23-vjeç.
Ishte ora 22:50 kur Elton Metaj i shkoi sërish në shtëpi në fshatin Zhupan. Xhelozia, apo fakti që nuk e linte të takonte të bijën, e çuan sërish të nervozuar Elton Metajn në derën e shtëpisë së vjehrrit të tij.
Veçse këtë herë, me vete mbante dhe mllefin që më shtator të 2020-ës, u fut në burg për hir të këtij konflikti. Eltoni kishte vetëm dy muaj që ishte liruar nga qelia, më 20 korrik të këtij viti, por duket se orët në izolim i ka kaluar duke menduar për hakmarrje.
Pas 3 orësh ndjekje, policia mundi ta vë në pranga 31-vjeçarin në një zonë të pyllësuzar në fshatin e tij, Peshtan, me armën e krimit në duar, ndërsa u sekuestua dhe motorin me të cilin u largua nga banesa e ish-vjehrrit.
Në 8 vite martesë çifti kishin një vajzë të mitur për hir të së cilës viktima ka duruar dhunën psikologjike e fizike të bashkëshortit të saj. Ndaj sipas autoririteteve, Elton Metaj, ka qenë arrestuar edhe më herët për dhunë në familje, armëmbajtje pa leje dhe kundërshtim të forcave të policisë.
Vëllai i viktimës, Armando Bengaj thotë se Eltoni kishte kërcënuar edhe vetë atë për ta vrarë, ndërsa gishtin e fajit ia drejton gjykatësve dhe prokurorëve që nxorrën nga burgu njerëz të tillë. Dhe në fakt, nëse drejtësia do të kishte vepruar me forcën e ligjit përballë një njeriu që rrezikon jetën e tjetrit, pikëpyetja e madhe që ngrihet, është nëse edhe jeta e Sabrinës mund të ishte shpëtuar.
Që çifti, tashmë i dovorcuar, kishin probleme, e pohonin edhe një vit më parë prindërit e Elton Metajt që në një intervistë për Report Tv thanë se djali kërkonte të shihte vajzën e tij të vogël, që në atë kohë, ende pa u ndarë, 23-vjeçarja e mori me vete dhe u largua te prindërit. Ndërsa nuk mungonin dhe akuzat për tradhti, duke thënë se djali e kishte kapur të renë të bisedonte me një tjetër në telefon.
g.kosovari
