Një majmun ka shkaktuar kaos në një qytet indonezian pasi sulmoi dhe plagosi gjithsej 18 persona, përfshirë fëmijë dhe të moshuar.
“Deri më tani, janë regjistruar 19 sulme me 18 viktima. Një person u sulmua dy herë”, tha për AFP të premten kreu i shërbimit të zjarrfikësve dhe shpëtimit të Tembilahan, Junaid Ismail.
Disa nga të plagosurit kishin nevojë për më shumë se një duzinë qepjesh dhe iu dhanë ilaçe kundër tërbimit.
Kafsha u gjet dhe u kap të enjten pasi u bllokua nga autoritetet në qytet. Ajo u dërgua në Pekanbaru, kryeqytetin e provincës Riau në Sumatra, ku do të ekzaminohet nga agjencia e jetës së egër.
Nga frika e sulmeve të mëtejshme, 40 shkolla mbetën të mbyllura të premten, ndërsa qindra nxënësve në zonë iu kërkua të ndiqnin mësimet online për tre ditë.
