Një ngjarje tronditëse ka përfshirë futbollin nigerian, pasi mbrojtësi Chinedu Ozor u shpall i vdekur pas një kolapsi gjatë një ndeshjeje miqësore, por më vonë shfaqi shenja lëvizjeje në morg.
Ozor, futbollist i sapotransferuar te Katsina United, u rrëzua në minutat e para të një ndeshjeje përgatitore ndaj Niger Tornadoes. Pas incidentit, ai u dërgua me urgjencë në spital, ku mjekët e deklaruan të vdekur.
Familjarët, tifozët dhe stafi i klubit u përballën me lajmin tragjik, ndërsa trupi i futbollistit u dërgua më pas në morg.
Por situata mori një kthesë të jashtëzakonshme. Sipas raportimeve, në morg u vu re se Ozor kishte lëvizur dorën, duke shkaktuar reagimin e menjëhershëm të stafit mjekësor.
Pas konstatimit të shenjave të lëvizjes, futbollisti u transportua me urgjencë drejt Katsina General Hospital, ku u shtrua në repartin e terapisë intensive.
Ozor aktualisht ndodhet nën kujdesin e mjekëve dhe po merr oksigjen, ndërsa ekipet mjekësore po përpiqen ta stabilizojnë gjendjen e tij.
Vetë Katsina United fillimisht kishte njoftuar në rrjetet sociale se futbollisti kishte ndërruar jetë pas emergjencës mjekësore në fushë.
“Ne vajtojmë humbjen tragjike të lojtarit tonë të sapoardhur, Chinedu Ozor, pas një emergjence mjekësore gjatë ndeshjes së sotme miqësore”, thuhej në njoftimin fillestar të klubit.
Më pas, klubi publikoi një tjetër informacion, duke bërë me dije se Ozor kishte shfaqur shenja jete dhe ishte kthyer nga morgu në spital.
Lajmi fillestar për vdekjen e Ozor kishte shkaktuar reagime të shumta në futbollin nigerian. Klube ku ai kishte luajtur më parë, përfshirë Heartland dhe Kano Pillars, shprehën ngushëllimet e tyre.
Edhe Nigeria Premier Football League dhe drejtues të klubeve të tjera reaguan publikisht ndaj asaj që në atë moment besohej se ishte një humbje tragjike.
Por situata ndryshoi pas zbulimit të shenjave të lëvizjes në morg.
Ozor ishte transferuar te Katsina United vetëm në fillim të këtij muaji, ndërsa po përgatitej për sezonin e ri.
Tashmë, e gjithë vëmendja është përqendruar te gjendja e tij shëndetësore dhe përpjekjet e mjekëve për ta stabilizuar.
