Shqiptarët nuk i kanë thënë kurrë “jo” dasmave, e sidomos atyre tradicionale dhe fetare. Ndonëse të mërguar, shqiptarët janë kthyer në vendlindje për të trokitur gotat e gëzimit me familjarët, farefisin dhe shoqërinë në momentin e tyre më të bukur të jetës, në martesë. Në episodin e parë te emisionit Hotspot në A2 CNN gazetari Armend Pire udhëtoi drejt Shkodrës, atje ku Xhulio dhe Maria vendosën të kurorëzohen. Ata jetojnë prej vitesh në Australi, por vendosën t’i thonë njëri-tjetrit “PO” aty ku kanë rrënjët familjare. Për t’u martuar zgjodhën Katedralen e Shën Shtjefnit teksa Dom Mark Pashkja i priste për t’i dhënë bekimet e Zotit.
“Jetojmë në Australi por erdhëm në Shqipëri të martohemi pasi kemi familjen, kushërirët, është një gjë e veçantë. Deshëm një dasmë tradicionale pasi kështu është lezeti, kështu na kanë mësuar prindërit tanë. Vendosëm në Kishë pasi Zoti është i shenjtë” – tha Xhulio për A2 CNN.
Më e emocionuar nga ky kurorëzim ishte Maria, e cila e përshkroi si një ditë të paharruar momentet e përjetuara në Katedralen e Shën Shtjefnit.
“Dëshira për të mbledhur njerëzit, për të parë njerëzit më të dashur duke festuar për dashurinë tonë. Në Kishë e kemi të rendësishme të dy pasi është është e rrënjosur prej familjeve tona gjithmonë. Ka qenë dëshirë e të dyve që të kishim një kurorëzim në Kishë. Është një ditë, një emocion që nuk kam fjalë ta përshkruaj” – tha Maria.
Nga viti në vitë çiftet që zgjedhin të kurorëzohen në Kishë është në rritje thotë Dom Mark Pashkja. Tradita dhe besimi ndërthuren bashkë kur bëhet fjalë për ditë të veçanta të jetës.
“Të gjitha çiftet e Kishës Katolike, të cilat jetojnë në mënyrën e përditshme në doktrinën e krishter, janë në një farë mënyre të ftuar por dhe “të detyruar” të vijnë e t’i thonë po njëri-tjetrit për Zotin. Martesa është një prej shtatë sakamenteve, ose siç njihet ndryshe një prej shtatë kurorave që përbën besimin e krishter, besimin në Kishën e Krishtit. Simbolizon pikërisht atë lidhje që Krishti kishte me Kishën. Besnikërinë e dashurisë së përjetshme në të mirë e në të keqe dhe kërkesën nga ana e njerëzve që Zoti të jetë gjithmonë i pranishëm e ta bekojë këtë martesë. Është kurorëzimi i një dashurie dhe fillimi i një etape të re, jo më si dy persona por si një trup i vetëm. Numri i të krishterëve që kërkojnë të martohen në Kishë është gjithmonë në rritje. Vetëm dashuria mund ta ndryshojë botën dhe sa më shumë dashur për të gjithë. Besoj ky është urimi dhe mesazhi që të gjithë duhet të përjetojmë në jetën tonë personale ” – tha Dom Mark Pashkja për A2 CNN.
Nga Australia kishin ardhur edhe miq të çiftit të cilët e shijuan shumë ceremoninë teksa thonë se martesa në Shqipëri është unik krahasur me venin e tyre.
“Jam shumë i lumtur, jam i lumtur për Xhulion. E njoh Xhulion prej 19 vitesh dhe jam i lumtur, ai më bëri të lumtur. Ishte hera e parë për mua që vija në Shqipëri dhe jam i lumtur që erdha për një dasmë. Dasma ishte shumë më ndryshe se në Australi. Është shumë e përafërt me atë italiane, por e dashuroj këtë. E mahnitshme.” – tha shoku i dhëndrit.
