Kryeministri Edi Rama deklaroi sot se shërbimi i ri celular do të trasformojë rrënjësisht shërbimet jashtë Shqipërisë nëpërmjet teknologjisë moderne.

Në një postim në statusin e tij ne Facebook, dhe ne një video promocionale, Kryeministri Rama shprehet se, “Një shërbim i ri në celularin e çdo shtetasi shqiptar në rrugën e transformimit rrënjësor të shërbimit të jashtëm të Shqipërisë #Rilindje 🌹#ShqipëriaeGjeneratësTjetër”.

Një ditë më parë ministria e Punëve të Jashtme në bashkëpunim me kompaninë Telekom Albania organizuan aktivitetin promovues të aplikacionit konsullor E-Konsullata, ku merrte pjesë Kryeministri Rama.

Në aplikacion ndodhen kontaktet e sakta dhe koordinatat e çdo përfaqësie shqiptare në botë; informacion mbi procedurat e legalizimeve të dokumenteve; shërbimet e tjera konsullore brenda dhe jashtë vendit; si dhe informacione mbi situatën politike dhe shëndetësore për secilin vend prej 181 vendeve pjesë e E-Konsullata./a.m.