Luan Maçi, autori i dyshuar i grabitjes me armë të një pike këmbimi valutor në zonën e “5 Majit” në Tiranë, fillimisht ka mohuar përfshirjen në ngjarje gjatë marrjes në pyetje nga policia.
Sipas burimeve hetimore, prova të rëndësishme për dokumentimin e grabitjes janë gjetur në banesën e tij nga efektivët e Komisariatit Nr. 4. Bëhet fjalë për rrobat që ai kishte veshur gjatë grabitjes, të cilat u gjetën brenda në lavatriçe. Pas gjetjes së rrobave, Maçi ka pranuar autorësinë e ngjarjes.
Në dëshminë e tij, ai ka deklaruar se grabitjen e kishte planifikuar më herët, por ishte trembur pas grabitjes me armë në një bankë në zonën e ish-Parkut disa javë më parë.
“E kisha planifikuar grabitjen prej kohësh. Por pas grabitjes me armë të bankës në zonën e ish-Parkut u frikësova dhe mendova ta shtyja planin për më vonë. Isha i detyruar sepse kam shumë borxhe dhe kam nënën sëmurë, në gjendje shumë të rëndë”, mësohet të ketë thënë ai.
Burime nga hetimi bëjnë me dije se menjëherë pasi kreu grabitjen, Maçi është larguar fillimisht në këmbë dhe është futur brenda tregut të Medresesë. Më pas ai ka dalë nga ana e pasme e tregut përmes disa rrugicave.
Sipas të njëjtave burime, në një pusetë ai ka fshehur armën e zjarrit që dyshohet se përdori gjatë grabitjes. Më pas ka marrë një taksi dhe është kthyer në banesën e tij. Për të shmangur identifikimin nga policia, ai ka hequr edhe mjekrën, duke shpresuar se do ta kishte më të lehtë të fshihej.
