Mediat braziliane, përfshirë CNN Brasil, kanë raportuar arrestimin e shqiptarit Ervin Mata, i cilësuar si “manjat”, i cili ishte në kërkim ndërkombëtar për trafik droge dhe aktivitet kriminal.
Sipas raportimit, Mata u arrestua mbrëmjen e së shtunës në Ilhabela, në shtetin e São Paulos, gjatë një operacioni të përbashkët të policisë federale dhe asaj ushtarake braziliane. Ai ishte në arrati prej vitesh dhe kërkohej nga drejtësia shqiptare.
Autoritetet braziliane bëjnë me dije se 39-vjeçari u lokalizua pas informacioneve të inteligjencës që tregonin lëvizjen e tij nga zona e Baixada Santista drejt bregdetit verior. Ai u ndalua në një ambient tregtar dhe më pas u shoqërua në një komisariat të Policisë Federale.
Gjatë operacionit, policia sekuestroi dy telefona celularë dhe dokumente identifikimi që përdorte i dyshuari.
Sipas Shqipëria, Mata ishte shpallur në kërkim ndërkombëtar që në vitin 2023, ndërsa në vitin 2025 ishte firmosur edhe urdhri për arrestimin e tij me qëllim ekstradimin. Ai akuzohet për trafik ndërkombëtar droge, pjesëmarrje në organizatë kriminale dhe veprimtari të tjera të paligjshme.
Hetimet e autoriteteve shqiptare kanë zbuluar se Mata dyshohet se ka koordinuar trafikimin e 240 kilogramëve kokainë në Frankfurt, në vitin 2020, nga ku dyshohet se ka përfituar miliona euro.
Po ashtu, sipas mediave braziliane, ai dyshohet edhe për përfshirje në organizimin dhe financimin e ngjarjeve kriminale të rënda.
Autoritetet shqiptare kanë kërkuar zyrtarisht ekstradimin e tij, ndërsa pritet vijimi i procedurave ligjore mes dy vendeve.
Artikulli i CNN Brasil: Magnata albanês procurado internacionalmente é preso em Ilhabela (SP)
