Volodymyr Zelensky tha se Ukraina është “plotësisht e përkushtuar” për të pasur një dialog konstruktiv me përfaqësuesit e SHBA në Arabinë Saudite javën e ardhshme, edhe pse Donald Trump tha se e kishte “më të lehtë” të merrej me Rusinë sesa me Ukrainën në përpjekjet për t’i dhënë fund luftës.
“Propozime realiste janë në tryezë. Çelësi është të lëvizësh shpejt dhe në mënyrë efektive”, tha presidenti ukrainas në X përpara udhëtimit të tij në Arabinë Saudite javën e ardhshme.
Zelensky tha se pas takimit të tij me princin e kurorës Mohammed bin Salman të hënën, përfaqësuesit diplomatikë dhe ushtarakë ukrainas do të qëndrojnë për një takim të martën me ekipin amerikan.
“Nga ana jonë, ne jemi plotësisht të përkushtuar ndaj dialogut konstruktiv dhe shpresojmë të diskutojmë dhe të biem dakord për vendimet dhe hapat e nevojshëm”, tha ai.
Por presidenti ukrainas bëri thirrje gjithashtu që sanksionet ndaj Rusisë të rriten pas një sulmi shkatërrues të shtunën . Dy raketa balistike goditën qendrën e Dobropillia në rajonin lindor të Donetskut , duke vrarë të paktën 14 persona dhe duke plagosur dhjetëra të tjerë.
“Sulme të tilla tregojnë se objektivat e Rusisë nuk kanë ndryshuar”, shkroi Zelensky në Facebook.
“Prandaj, është thelbësore të vazhdojmë të bëjmë më të mirën për të mbrojtur jetët, për të forcuar mbrojtjen tonë ajrore dhe për të rritur sanksionet kundër Rusisë . Çdo gjë që e ndihmon Putinin të financojë luftën duhet të shembet”, shtoi ai.
