Miratoni reformën e TVSH, të pensioneve, kodi e procedurës civile, pavarësinë e institutit të statisikave, krijoni një institut për të kontrolluar bilancet dhe zbatoni direktivat për shpëtimin e bankave – këto janë kushtet e vendosura në formë ultimatumi nga Eurogrupi ndaj Greqisë. 19 krerë shtetesh të Eurozonës kanë rreshtuar sonte, në një samit në Bruksel, listën e kushteve të ashpra ndaj Athinës zyrtare. Një listë të cilën e bën edhe më të ashpër afati kohor: Greqia duhet të fillojë zbatimin e këtyre masave brenda tre ditëve!
Nga ana tjetër Eurogrupi kërkon kthimin e trojkës në bisedime zyrtare me palën helene. Një element që ishte lënë pezull pas fitores së Syrizas në zgjedhjet e fundit. Kanë rënë kështu alternativat e tjera në lojë: reduktimi i borxhit që kërkonte pala greke, i cili lidhet me daljen nga zona euro për një periudhë të caktuar kohore. Duhet kujtuar se programi i tretë i shpëtimit financiar të Greqisë shkon në 82-86 miliard euro, prej të cilave 7 duhen brenda datës 20 korrik.
