Pas takimit kokë më kokë me presidentin e Parlamentit Europian, Martin Schultz, kryetari i Kuvendit Ilir Meta doli në një konferencë të përbashkët për mediat.
Meta përshendeti marrëveshjen e BE-së me Greqinë, duke e konsideruar atë si rrugën e duhur .
Meta theksoi rëndësinë e marrëdhënieve të mira midis Shqipërisë dhe PE-së, si shumë të rëndësishme për integrimin e vendit në BE. Meta falenderoi Schultz dhe PE për asistencën në integrimin e institucioneve tona krah atyre ndëkombëtare sa i përket standarteve.
“Kam falenderuar Parlamentin Europian për ndihmën që po na jep në procesin e integrimit në BE. Kemi vlerësuar se marrëdhënia mes PE-së dhe Kuvendit është i rëndësishëm për mbarëvajtjen e negociatave“, tha Meta.
Kreu i Kuvendit u shpreh se po punohet për përmbushjen e 5 priotiteteve të vendosura nga BE. Meta përmendi në këtë rast reformën në drejtësi, ku sot u arrit marrëveshja midis opozitës dhe mazhorancës.
“I shpreha gadishmërinë zotit Schulz për përmbushjen e 5 prioriteteve kyçe. Fokusi i qeverisë është reforma në drejtësi tashmë”.
Në linja të ngjashme, Schulz ka shprehur gjithashtu kënaqësinë e tij për marrëveshjen BE-Greqi. “Kjo deklaratë e përbashkët është e rëndësishme për BE, Greqinë, por edhe për Shqipërinë”, ka thënë Schulz.
Duke falenderuar qeverinë e Tiranës për ftesën, kreu i PE ka vlerësuar punën e Shqipërisë në ruajtjen e stabilitetit vendas e rajonal. “Ajo që është bërë në 2 vjet është shumë e rëndësishme. Për të ruajtur stabilitetin është e rëndësishme reforma në drejtësi”, ka thënë ai.
Ai ka shtuar se, “marrëdhëniet mes PE dhe Kuvendit të Shqipërisë do të vijnë duke u intensifikuar”. “Shpreh mbështetjen time për reformat që kanë nisur. Është e rëndësishme që ato të jenë të suksesshme dhe një rëndësi të vecantë këtu ka edhe debati politik”, ka thënë kryetari i PE.
