Pas deklaratave të dyanshme për një takim mes kreut të PS e PD, kabineti i kryeministrit nuk ka humbur kohë. Pak minuta më parë është publikuar një letër ku i bëhet thirrje liderit të opozitës Basha për një takim dypalësh në lidhje me sheshimin e mosmarëveshjeve për reformë në drejtësi.
Në letrën e kabinetit të Ramës, drejtuar zyrës së Bashës, shkruhet se Kryeministri është i gatshëm që ta takojë kryedemokratin që ditën e nesërme në orën 11:00 të paradites, madje duke propozuar edhe vendin e takimit.
Në letër saktësohet se në takimin që mund të mbahet në Sallën e Hartave në Kryeministri, Rama do të jetë i shoqëruar nga kryetari i komisionit të reformës, deputeti Fatmir Xhafaj si dhe kreu i komisionit për reformën zgjedhore Bashkim Fino.
Ndërkohë mësohet se kreu i PD do të jetë nesër në Luksemburg në 40 vjetorin e PPE, kësisoj takimi duhet te prese deri te marten kur ai te kthehet.
LETRA
Tiranë, me 27 maj 2016
Drejtuar: Znj. Greta Deljani
Drejtori i Kabinetit
Partia Demokratike e Shqipërisë
E nderuar zonja Deljani,
Duke marrë shkas nga shprehja publike e gatishmërisë së zotit Lulzim Basha për t’u takuar me Kryeministrin, zotin Edi Rama, jam e autorizuar t’ju komunikoj se ftesa që Kryeministri i ka dërguar zotit Basha mbetet gjithmonë e hapur.
Kryeministri është i gatshëm të takohet me Kryetarin e Partisë Demokratike që nesër në orën 11:00. Zoti Basha është sigurisht i mirëpritur të caktojë orën e takimit në çdo rast.
Duke qenë se vendi i takimit është lënë në zgjedhjen e Kryeministrit, ai mund të zhvillohet në Sallën e Hartave, në godinën e Këshillit të Ministrave. Kryeministri do të jetë i shoqëruar nga Kryetari i Komisionit parlamentar për Reformën në Drejtësi, Z. Fatmir Xhafaj, si edhe nga Kryetari i Komisionit parlamentar për Reformën Zgjedhore, Z. Bashkim Fino. Zoti Basha është mëse i mirëpritur të vijë i shoqëruar sipas dëshirës së tij.
Në kuadër të këtij takimi, Kryeministri do të dëshironte të trajtonte sëbashku me Kryetarin e Partisë Demokratike, çështjen e Reformës në Drejtësi, atë të Reformës Zgjedhore dhe çdo çështje tjetër me rëndësi dhe interes të përbashkët.
Për rëndësinë e posaçme të këtij komunikimi, kjo letër do të publikohet në faqen zyrtare të Kryeministrisë.
Duke ju falënderuar për mirëkuptimin dhe bashkëpunimin, mbetem në dispozicion për çdo detaj të organizimit të këtij takimi.
Me konsideratë,
Vali Bizhga
Drejtori i Kabinetit
.jpg)
