Vajza që e fejoi familja me burrin 27 vjet më të madh ka rrëfyer netët e tmerrit në shtëpinë e tij, përdhunimet dhe kërcënimet me jetë.
“Martin Haxhiaj erdhi e kërkoi dorën time në shtëpi. Prindërit, pa marrë fare parasysh faktin se ishte 27 vjet më i madh, pranuan të më fejonin. Unë nuk doja, se isha në shkollë ende dhe ai shumë i madh për mua, por familja më detyroi të fejohesha me të. Edhe pse këmbëngula për shumë kohë se nuk dëshiroja të lidhesha me atë person, familja insistoi shumë dhe më detyroi të pranoja fejesën me Martinin” ka treguar vajza.
Ajo ka shtuar më tej se në fund të marsit u fejuan dhe pas pak ditësh ai erdhi e mori që të rrinte ca ditë në shtëpinë e tij në Durrës, ku jetonte me familjen
“Këtu nisi gjithçka. Qëndrova për një javë aty dhe i fejuari më detyronte të kryeja marrëdhënie seksuale pa dëshirë. Ai më përdhunonte çdo natë dhe më kërcënonte se do më vriste nëse do të largohesha prej tij. Kur u ktheva në shtëpi, u tregova prindërve se çfarë më kishte ndodhur dhe iu betova se nuk doja të vazhdoja lidhjen me Martinin”, mësohet të jetë shprehur 15 vjeçarja në Polici.
KËRCËNIMI
Minorenia ka treguar se ajo ishte përdhunuar dhe kërcënuar nga i fejuari i saj, i cili nuk pranonte faktin se 15vjeçarja nuk e pranonte si bashkëshortin e saj të ardhshëm. Ajo ka pohuar se, përveçse e përdhunoi për disa ditë intensivisht në shtëpinë e tij, Martin Haxhiaj e kërcënonte me jetë kur i kishte thënë se do prishte fejesën. “Pasi u ktheva në shtëpinë time, u thashë prindërve se nuk do të vazhdoja më me të dhe i thashë edhe Martinit se do ta prishja fejesën. Ai u irritua jashtë mase dhe këmbëngulte se do të më vriste nëse largohesha prej tij. Unë e kisha vendosur se nuk do të kthehesha më e gjallë tek ai njeri. Martini më merr në telefon dhe më kërcënon. Kërkoj ndihmë nga policia, pasi ndihem e kërcënuar”, mësohet të ketë pohuar ndër të tjera minorenia, që u fejua nga familja pa dëshirën e saj.
Pas denoncimit, i cili u krye nga vetë minorenia 11 ditë më parë, policia e Lezhës nisi hetimet për të zbardhur dinamikën e ngjarjes dhe vuri në pranga 41vjeçarin në bashkëpunim me policinë e Durrësit. Martin Haxhiaj akuzohet për veprat penale “marrëdhënie seksuale ose homoseksuale me të mitur” dhe “shtrëngimi apo pengimi për të bashkëjetuar ose për të lidhur apo zgjidhur martesë”. Mësohet se në hetim janë edhe prindërit e vajzës, të cilët e detyruan atë për fejesë. (panorama)
