Një histori tradhtie, që trazoi familjen e një këngëtari të muzikës popullore nga një qytet i Jugut të Shqipërisë u tregua sot në studion e emisionit “Me zemër të hapur” në News 24 nga dashnorja e tij, një vajzë 29-vjeçare që pretendoi se fillimisht ishte përdhunuar nga këngëtari.
Por në gjithë këtë histori më shumë se ajo vetë, viktimë është një vogëlushe tre vjeçare, që ka mbetur mes katër rrugëve, pa ushqim, pa veshje e që jeton në një shtëpi të rrënuar bashkë me nënën e saj.
29-vjeçarja rrëfeu në studion e emisionit “Me Zemër të Hapur” në News 24 se kur gruaja e këngëtarit mori vesh gjithë historinë, e detyroi ta braktiste vajzën në jetimore. Ai nga ana tjetër ndërpreu çdo kontakt me të dhe i la të dyja në mëshirë të fatit.
Ajo i pranon gabimet dhe përgjithësinë që ka në gjithë këtë histori, por nuk do që ato t’i vuajë e bija, të cilën nuk do ta braktisë për asnjë arsye në këtë botë.
“Vajza ime meriton të rritet si gjithë fëmijët e tjerë. Babai i saj nuk duhet t’ja mohojë”, rrëfeu live 29-vjeçarja që u përlot teksa tregonte vuajtjet e saj.
“Të gjithë historinë e tregova që vajza ime të mos vuajë më, nuk dua të ndahem nga ajo”,- thotë e ëma mes të tjerash.
Në emision u treguan live edhe ambientet e banesës njëkatëshe ku e reja është detyruar të rrisë të bijën. Mure me lagështirë, suva e rënë, mobilje të vjetra, e tek tuk disa lodra. Këto janë gjithçka që mundet t’i sigurojë kjo nënë e vetme të bijës. Për të shembur varfërinë dhe për t’i siguruar asaj një të ardhme më të mirë, ajo pranoi publikisht gabimet që kish bërë në jetë. Më shumë se sa paragjykim për ato që ka bërë, sot ajo kërkon ndihmë, jo për vete, por për vajzën! E nëse babai biologjik iu ka kthyer shpinën, në studion e emisionit “Me Zemër të Hapur” 29-vjeçares iu kthye sërish shpresa: Po, për ty ka zgjidhje dhe do të ndihmojmë!
/a.m.
