Më shumë se 500 refugjatë Rohingya rezultojnë të zhdukur pasi dy anije me rreth 530 azilkërkues u nisën nga shteti Rakhine në Myanmar më 29 qershor dhe nuk ka më asnjë informacion për ta.
Sipas organizatave që monitorojnë situatën e komunitetit Rohingya, ekziston frika se të dyja anijet janë mbytur në det për shkak të motit të keq dhe dallgëve të fuqishme të sezonit të musoneve.
Anijet, të cilat zakonisht janë peshkarexha të vjetra të përshtatura për të transportuar sa më shumë njerëz, konsiderohen të pasigurta për lundrim dhe shpesh kanë probleme teknike. Besohet se rreth gjysma e pasagjerëve ishin gra dhe fëmijë.
Për shkak të konfliktit të armatosur që vazhdon në shtetin Rakhine dhe ndërprerjes së shumicës së komunikimeve, është pothuajse e pamundur të konfirmohet me saktësi fati i anijeve.
Chris Lewa, drejtuese e organizatës Arakan Project, e cila mbron të drejtat e Rohingyave, tha se ka mbledhur informacione nga burime të ndryshme që konfirmojnë se të dyja anijet u nisën më 29 qershor nga fshati Sin Tet Maw, një zonë e kontrolluar nga Ushtria Arakan.
Sipas saj, destinacioni ishte bregdeti jugor i Myanmarit, prej nga emigrantët do të transportoheshin në rrugë tokësore përmes Tajlandës drejt Malajzisë, një nga destinacionet kryesore për refugjatët Rohingya.
Familjet zakonisht marrin lajme nga të afërmit brenda një jave deri në dhjetë ditë pas nisjes, por kanë kaluar gati tre javë pa asnjë kontakt.
Autoritetet në Bangladesh kanë gjetur trupin e pajetë të një gruaje të dalë në breg, ndërsa peshkatarët në brigjet e Myanmarit raportuan se kanë hasur edhe disa trupa të tjerë në det.
Këto të dhëna kanë forcuar dyshimet se të dyja anijet janë mbytur, njëra vetëm pak orë pas nisjes, ndërsa tjetra pas disa ditësh lundrimi.
Aktualisht, mbi një milion Rohingya jetojnë në kampe të mbipopulluara refugjatësh në jug të Bangladeshit, ku përballen me mungesë ndihmash humanitare, papunësi, kufizime të lëvizjes dhe rritje të aktivitetit të grupeve kriminale, çka i shtyn shumë prej tyre të ndërmarrin udhëtime të rrezikshme në kërkim të një jete më të sigurt.
