Dy punonjës të Policisë Rrugore në kryeqytet janë pezulluar nga detyra. Kjo masë vjen fill pas publikimit të një video ku shfaqen efektivët Agron Boga dhe Nazmi Xhaja, të cilët dyshohet se kanë përfituar para nga një drejtues mjeti, duke shkelur rëndë detyrën.
Pas verifikimeve të bëra nga Drejtoria e Standardeve Profesionale në Policinë e Shtetit ka rezultuar se punonjësit e sipërpërmendur, në datën 8 janar 2016, në orët e pasdites, po kryenin shërbimin në aksin kombëtar Kashar-Tiranë dhe kanë ndaluar një automjet pasi kishin marrë njoftim se udhëtonte me xhama të errësuar.
Dyshohet se punonjësit e policisë kanë shkelur detyrën duke mos ndëshkuar drejtuesin e automjetit, në këmbim të parave. Sakaq, video në fjalë e dy punonjësve të policisë u publikua në faqen “Jeta Osh Qef”.
BW
