Maqedonia është duke kaluar një prej momenteve më të vështira gjatë dekadave të fundit. Përfaqësuesja fqinje mbylli në mënyrën më të shëmtuar të mundshme eliminatoret e kaluara të Kampionatit Europian. Kombëtarja i mbylli në vend të fundit eliminatoret e Europianit ku i la mbrapa edhe Luksemburgu apo Bjellorusia.
Me vetëm një fitore dhe një barazim në dhjetë ndeshje, Maqedonia ishte një prej ekipeve më të dobëta në edicionin e fundit. Të hënën, përfaqësuesja e drejtuar nga Igor Angelovski do të nisë një rrugë të re, eliminatoret e Kampionatit Botëror. Përballë Shqipërisë në Shkodër, fqinjët do të tentojnë një rezultat pozitiv në startin e eliminatoreve.
Optimizmi
Ekipi është grumbulluar prej disa ditësh në Shkup ku ka zhvilluar seancat stërvitore. Përfaqësuesja është stërvitur në kompleksin “Peter Milloshevski”. Fqinjët kanë zhvilluar dje seancën e fundit në Maqedoni, pasi sot do të udhëtojnë drejt Shkodrës. Trajneri Igor Angelovski dhe lojtarët janë optimistë dhe kanë shprehur se dëshirojnë një rezultat pozitiv në këtë sfidë për të nisur një cikël të ri.
Te Maqedonia e njohin shumë mirë forcën e Shqipërisë, e cila mori pjesë edhe në Europianin e Francës. Seanca e djeshme, që ishte e fundit në Shkup, ka kaluar e qetë dhe nën një atmosferë të ngrohtë. Futbollistët kanë praktikuar lojëra të ndryshme zbavitëse, ndërsa batutat kanë shoqëruar seancën gjatë të gjithë kohës.
Ekipi është stërvitur për rreth 90 minuta dhe trajneri ka dhënë udhëzimet e rastit. Ekipi do të udhëtojë sot drejt Shkodrës ku do të zhvillojë stërvitjen e fundit dhe do të akomodohet përpara takimit të së hënës.
Skuadra
Atmosfera në skuadër është shumë e qetë. Trajneri Angelovski do t’i ketë të gjithë futbollistët në dispozicion për këtë takim. Nuk ka dëmtime apo pezullime. Gjatë këtyre ditëve përgatitore, tekniku i përfaqësueses i ka kushtuar më shumë rëndësi mbrojtjes. Përballë Shqipërisë në transfertë, synimi do të jetë një rezultat pozitiv.
Kujtojmë që në edicionin e kaluar të eliminatoreve, Maqedonia ka bërë një paraqitje shumë të dobët ku në 10 takime shënoi vetëm 6 gola dhe pësoi 18. Duke parë situatën, tekniku i ka kushtuar shumë rëndësi mbrojtjes dhe ka dhënë udhëzime se si të neutralizohen mesfushorët dhe sulmuesit e Shqipërisë.
Panorama/d.i.
