Afrika tregon se ekstremizmi në futboll është shumë i rrezikshëm. Në Ugandë, vetëm javën e fundit, kanë ndodhur dy vrasje për shkak të sherreve për ekipet e zemrës, që kaluan çdo kufi të mundshëm.
Goli i fitores 3-2 i Eddie Nketiah, në minutat shtesë, ndaj Manchester United, në 22 janar, shkaktoi viktimën e parë. Tifozët nuk u çmendën vetëm në “Emirates Stadium”, por edhe 6500 km larg, në Adjumani. Gjatë festimeve të tepërta, një tifoz i United goditi me sende të forta në kokë një të Arsenalit, i cili ndërroi jetë në spital nga plagët e marra.
Pesë ditë më vonë, në të njëjtin qytet, një tjetër tifoz i Arsenalit u vra, kësaj radhe me thikë, pas ndeshjes Arsenal-City, ku “Topçinjtë” u eliminuan nga FA Cup.
Për BBC, Joseph Kabuleta, ish-shefi i Shoqatës së Gazetarisë Sportive në Ugandë, u shpreh: “Kur një shoqëri humb shpresën në çdo fushë të jetës, humbja ose fitorja shkaktojnë eufori ose zymtësi ekstreme”.
/a.r
