Dy persona humbën jetën pasi një dron ukrainas goditi një ndërtesë banimi në rajonin e Saratovit, në kuadër të një prej valëve më të mëdha të sulmeve ajrore gjatë natës të këtij viti, njoftuan autoritetet ruse të dielën.
Guvernatori i rajonit, Roman Busargin, bëri të ditur se droni goditi një pallat shumëkatësh, duke shkaktuar vdekjen e dy personave.
Ndërkohë, në rajonin e Samarës, guvernatori Vyacheslav Fedorishchev tha se dronët ukrainas goditën një depo të kompanisë Wildberries, platformës më të madhe të tregtisë elektronike në Rusi. Sipas shërbimit për shtyp të kompanisë, sulmi shkaktoi zjarr, por paraprakisht nuk janë raportuar viktima.
Nga ana tjetër, Shtabi i Përgjithshëm i Ukrainës njoftoi përmes Telegramit se forcat ukrainase goditën edhe rafinerinë e naftës në Ufa, e operuar nga Bashneft.
Guvernatori i Bashkortostanit, Radiy Khabirov, deklaroi se sistemet e mbrojtjes ajrore ruse zmbrapsën një sulm të gjerë me dronë ndaj objekteve industriale në rajon. Sipas tij, u rrëzuan 25 dronë, ndërsa mbetjet e njërit prej tyre shkaktuan zjarr në një zonë industriale të Ufas. Autoritetet thanë se nuk pati viktima.
Ushtria ukrainase pretendoi gjithashtu se goditi një depo nafte në rajonin e Kalugës dhe një bazë të përdorur për lëshimin e dronëve sulmues në rajonin e Bryanskut. Deri më tani, autoritetet ruse nuk kanë komentuar këto pretendime.
Ndërkohë, Ministria e Mbrojtjes e Rusisë njoftoi se gjatë natës forcat ruse zhvilluan sulme ndaj objektivave ushtarake në Ukrainë, duke përdorur armë precize të lëshuara nga ajri dhe dronë sulmues.
