Numri i shoferëve që do të paguajnë taksën e luksit do të rritet, kjo për shkak të uljes së pragut të çmimit mbi të cilën do të taksohet një makinë. Me paketën fiskale të 2017-s, nga 1 janari taksa e re do të paguhet nga makinat me çmim blerjeje mbi 5 milionë lekë, nga 7 milionë lekë që është aktualisht.
Drejtori i Drejtorisë së Regjistrimit të Mjeteve, Fiqiri Midha, në intervistën dhënë gazetës shpjegon se taksa e luksit paguhet nga autoveturat me numrin e vendeve 4+1, me cilindrat 3000 kubikë dhe çmim blerjeje 7 milionë lekë. Midha thotë se taksa e re paguhet edhe në rast se mjeti përmbush vetëm një prej kritereve. Sipas tij, taksa e luksit paguhet nga rreth 5400 mjete, ose 1,5 për qind e totalit të makinave.
Ministria e Financave ka gati paketën fiskale ku një ndryshim është që makinat e luksit nuk do të konsiderohen ato që kanë çmim prej 7 milionë lekësh, por 5 milionë lekë. Aktualisht, në Drejtorinë e Shërbimeve të Transportit Rrugor sa mjete janë regjistruara si makina luksi?
Në zbatim të ligjit nr. 141/ 2015, dt.17.12.2015, për taksat në Republikën e Shqipërisë për mjetet rrugore, Drejtoria e Përgjithshme e Transportit, duke filluar që nga 1 janari, nisi zbatimin e programit të taksës së luksit për mjetet e klasifikuara sipas ligjit. Pra, sipas ligjit bëhet fjalë për autoveturat me cilindrat motorik 3 mijë kubikë dhe më lart, si dhe të çmimit që është blerë mjeti mbi 7 milionë lekë, ku të dhënat u morën nga Doganat.
Në veprimtarinë e aktivitetit të taksimit të mjeteve si 9-mujor për këtë kategori mjetesh, janë 5421 mjetë luksi autoveturë të taksuara, sipas dy kritereve që i përmban ligji, pra cilindrati mbi 3 mijë kubikë dhe çmimi i mjeti mbi 7 milionë lekë. Nga këto, 5421 mjete të taksuara që përbëjnë 1.5 % të totalit të 420 mijë mjeteve që janë taksuar për 2016-n në të gjithë vendin, 600 mjete luksi janë të reja, pra janë regjistruar për herë të parë për të paguar taksën e re.
Si llogaritet taksa për makinat luksoze, çfarë kriteresh duhet të plotësojë një drejtues për të paguar këtë taksë?
Taksa e luksit për këto mjete llogaritet në dy faza. Pavarësisht nga pagesa e taksës vjetore të mjeteve të përdorura, mbi makinat luksoze zbatohet taksë regjistrimi për herë të parë në masën 70.000 lekë dhe taksë e përvitshme në masën 21.000 lekë çdo vit. Taksa prej 70 mijë lekësh është taksa vetëm për regjistrim për herë të parë dhe kjo taksë nuk e shoqëron mjetin pas regjistrimit për herë të parë, pra në vitin pasardhës drejtuesi i mjetit do të paguajë vetëm 21 mijë lekë.
Në bazë të ligjit, taksa e luksit paguhet nga makinat me cilindrat motorik mbi 3 mijë kubikë dhe çmimi i mjetit të jetë mbi 7 milionë lekë. Kjo taksë paguhet edhe nëse mjeti përmbush vetëm një prej kritereve. P.sh., në rast se mjeti ka cilindrat 3 mijë kubikë, por nuk ka çmimin e blerjes 7 milionë lekë, ky mjet do të paguajë taksën e luksit. Mund të plotësohen të dyja kriteret, ose mund të jetë vetëm njëri prej tyre.
Pra mjeti që ka cilindrat 3 mijë kubikë taksohet me taksën e luksit. Në rast se mjeti është me cilindrat më pak se 3 mijë kubik, por vlerën e tij e ka mbi 7 milionë lekë, atëherë do të taksohet si mjet luksi.
Cilat kategori makinash paguajnë taksën e luksit?
Kategoria e mjeteve të luksit është autovetura me numrin e vendeve 4+1. Ne kemi të regjistruar edhe kamionë që kanë cilindrat 12 mijë kubikë, por kategorizohen si mjete pune dhe janë të përjashtuara nga taksa e luksit. Të gjitha kategoritë e mjeteve që tejkalojnë numrin e vendeve 4+1 nuk quhen mjete luksi, por mjete pune që përdoren si për transport pasagjerësh, apo edhe mallrash.
Pra mjet luksi është autovetura 4+1 që i shërben personit, nuk ka rëndësi marka apo modeli, por është mjet luksi për efekt të dy kritereve që janë përcaktuar në ligj, kubikët dhe çmimi i makinës.
Sa është vlera e taksave të mbledhura nga makinat e luksit dhe cilat janë qytetet me regjistrimin më të lartë të këtyre mjeteve?
Për 9-mujorin e këtij viti taksat e arkëtuara nga 5421 mjete është 107 milionë lekë, ndërsa për 600 mjetet e luksit që janë regjistruar për herë të parë, taksat e arkëtuara janë në vlerën e 4,2 milionë lekëve. Në provinca numri i makinave të regjistruara si makina luksi është më i ulët, ndërsa numri më i lartë i këtyre makinave është i regjistruar në qytetet si Tirana, Durrësi, Fieri, Shkodra dhe Vlora./panorama/a.k
