JAVANEWS / A ka rrezik që sindromi i “Gjykatës së Lartë”, ku për shkak të përplasjeve mes Presidentit, Bujar Nishani me mazhorancën e majtë, ende nuk janë plotësuar dy vendet bosh në këtë Gjykatë, të përsëritet edhe për zgjedhjen e dy anëtarëve të rinj të Gjykatës Kushtetuese? Duke iu referuar procesit që ndiqet për plotësimin e vendeve bosh në këto gjykata, ku anëtarëve të saj u mbaron mandati, gjasat janë që të kemi sërish një “duel të paheshtur” mes Presidencës dhe Kuvendit, lidhur me zëvendësimin e 2 anëtarëve të Gjykatës kushtetuese, Vladimir Kosta dhe Sokol Berberi, të cilëve u mbaron mandati.
Në bazë të procedurës është Presidenti i Republikës ai që ccon në Kuvend emrat për 2 anëtarët e rinj të Gjykatës Kushtetuese dhe më pas është Kuvendi ai që i miraton. Gjithshka përcaktohet në nenin 125 të Kushtetutës, i cili në pikën 1 bën fjalë për zgjedhjen e anëtarëve të Gjykatës Kushtetuese. “Gjykata Kushtetuese përbëhet nga 9 anëtarë, të cilët emërohen nga Presidenti i Republikës me pëlqimin e Kuvendit”, thuhet në pikën e parë të këtij neni, i cili është i njëjtë edhe në rastin e zgjedhjes së anëtarëve të Gjykatës së Lartë. Duke iu referuar praktikës së ndjekur mes dy institucioneve këto vitet e fundit, si në marrdhëniet mes ish- presidentit, Bamir Topi, me mazhorancën e PD-së, po për anëtarët e Gjykatës së Lartë, ashtu edhe në marrdhëniet mes Presidentit Nishani me mazhorancën e majtë, ku mes dy institucioneve ka pasur përplasje sa i përket emrave të propozuar nga Presidenti, bëhet e qartë se edhe në këtë rast rrezikohet që “sindromi i Gjykatës së Lartë” të përfshijë edhe procesin e zgjedhjes së dy anëtarëve të Gjykatës Kushtetuese.
Ndonëse është ende herët për të dhënë një gjykim për mënyrën sesi do të rrjedhin ngjarjet mes dy institucioneve, procesi i përzgjedhjes së 2 anëtarëve të Gjykatës Kushtetuese, nuk pritet të shkojë si “në vaj”, duke pasur parasysh edhe rolin e rëndësishëm që ka Gjykata Kushtetuese në praktikat e cështjeve që ajo shqyrton edhe në raport me Kuvendin. Gjithsesi, ligji nuk lë vakanca sa i përket funksionimit të Gjykatës Kushtetuese, pasi në pikën 5 të nenit 125 thuhet se “Gjyqtari i Gjykatës Kushtetuese vazhdon në detyrë deri në emërimin e pasardhësit të tij”. Në këtë mënyrë mandati i dy anëtarëve të kësaj gjykate mund të shkojë edhe tej parashikimit ligjor. (javanews.al) Me. Ar
Kushtetuta për zgjedhjen e anëtarëve të Gjykatës Kushtetuese
Neni 125
- Gjykata Kushtetuese përbëhet nga 9 anëtarë, të cilët emërohen nga Presidenti i Republikës me pëlqimin e Kuvendit.
- Gjyqtarët emërohen për 9 vjet, pa të drejtë riemërimi, nga radhët e juristëve me kualifikim të lartë dhe me përvojë pune jo më pak se 15 vjet në profesion.
- Përbërja e Gjykatës Kushtetuese përtërihet çdo tre vjet në një të tretën e saj sipas procedurës së caktuar me ligj.
- Kryetari i Gjykatës Kushtetuese emërohet nga radhët e anëtarëve të saj nga Presidenti i Republikës, me pëlqimin e Kuvendit, për një periudhë prej 3 vjetësh.
- Gjyqtari i Gjykatës Kushtetuese vazhdon në detyrë deri në emërimin e pasardhësit të tij.
