Një përplasje në seri në kahun drejt Fierit shkaktoi një të plagosur që u dërgua me urgjencë në spitalin e Lushnjes. Në aksident u përfshinë një “Caddy” dhe dy “Benz“, me dëme materiale të konsiderueshme.
Gazetarja Anila Sefa raporton për “Klan News” se në një tjetër aksident, një “Skoda” përfundoi tek barriera e hekurt në kryqëzim, fatmirësisht pa pasoja për jetën e drejtuesit.
Mjetet kanë pësuar dëme të shumta materiale. Trafiku nuk është i bllokuar pasi makinat janë spostuar në anë të rrugës.
Sefa raportoi se vendi ku ndodhi aksidenti është një njollë e zezë e njohur në vend, për shkak të aksidenteve të shumta që ndodhin aty. Sipas gazetares, në këtë aks duhet rishikuar sinjalistika rrugore.
“Është marrë vendimi që kjo nyje të mbyllet. As semafori as mbikalimi nuk e zgjidh problemin.
Duhet të hapet rrugë dytësore që të mundësojë lidhjen e dy njësive vendore, sepse për sa kohë ‘Pushimi i Shoferit’ të jetë nyjë e hapur aksidentet këtu do të vazhdojnë dhe qëndrimi në semafor nuk e zgjidh problemin, për sa kohë ti ke vënë tabela që shpejtësia të jetë 80 kilometra në orë. Pra duhet një rishikim edhe një herë i të gjithë këtij aksi i sinjalistikës rrugore, sepse nuk është semafori në fund të ditës që e zgjidh këtë problematikë. Është një njollë e zezë e njohur në Shqipëri.”, tha Sefa.
