Të paktën 17 tërmete me magnitudë deri në 4.4 janë regjistruar vetëm pak kilometra larg ‘Zona 51’, një fenomen që falë teorive konspirative e lidhin bazën amerikane me UFO-t, alienët dhe testimet e avionëve eksperimentalë.
Tërmeti i magnitudës 4.4 ka nxitur spekulime për mundësinë e testimeve të mundshme nëntokësore.
Lëkundjet u regjistruan në një zonë që zakonisht nuk njihet për aktivitet të shpeshtë sizmik, duke ngritur pyetje midis vëzhguesve.
Gjeofizikani Stefan Burns e përshkroi vendndodhjen si “një vend të pazakontë për të pasur një tërmet”, duke vënë në dukje se rajoni historikisht ka mbetur relativisht i qetë krahasuar me zona të tjera të rënda në Perëndim.
Gjithashtu, ai tregoi thellësinë e vogël të tërmetit më të fortë, rreth katër kilometra nën tokë, një detaj që ai tha se e bënte ngjarjen veçanërisht të rëndësishme.
Burns shtoi se tërmetet dhe shpërthimet nëntokësore ndonjëherë mund të prodhojnë goditje sizmike të ngjashme, veçanërisht kur energjia çlirohet papritur nën sipërfaqe. Ndërsa ai theksoi se ngjarja ishte me shumë mundësi një tërmet natyror, ai pranoi se kishte ‘ambiguitet’ në të dhënat sizmike dhe tha se karakteristikat e pazakonta e bënin aktivitetin ‘të vlefshëm për t’u diskutuar në kontekstin nëse ky është një test bërthamor nëntokësor i fshehtë’.
Mbi 100 persona raportuan se ndjenë lëkundje tek US Geological Survey (USGS). Megjithatë, zona është kryesisht e banuar nga personel ushtarak, kontraktorë dhe staf.
Shkretëtira e Nevadës ndodhet brenda një rajoni tektonik aktiv ku toka po shtrihet ngadalë, duke bërë të mundur shpërthime të papritura aktiviteti sizmik edhe pranë vendeve sensitive si ‘Zona 51’.
Raportet e tërmeteve u përhapën shpejt online, me një përdorues të X që bëri shaka duke shkruar se “Alienët po shkundin Tokën!”
“Zona 51” ka nxitur spekulime prej dekadash, veçanërisht që nga Lufta e Ftohtë, kur vendndodhja e saj e largët në shkretëtirë dhe operacionet sekrete e bënë atë një objektiv natyral për thashethemet rreth UFO-ve.
Një raport i vitit 2025 pretendonte se ishte Pentagoni ai që në fakt krijoi konspiracionet e UFO-ve për të fshehur një program të klasifikuar armësh.
Sipas një rishikimi të Departamentit të Mbrojtjes së SHBA (DOD), qeveria zhvilloi një fushatë të qëllimshme dezinformimi gjatë epokës së Luftës së Ftohtë, duke shkuar deri aty sa të shpërndante foto të rreme të objekteve fluturuese te banorët.
Në vitet 1980, një kolonel i Forcave Ajrore të SHBA thuhet se u dha klientëve të një bari në zonë imazhe të manipuluar të UFO-ve, duke pretenduar se ishin marrë në atë zonë.
Fotografitë u varën shpejt në mur, duke ndezur spekulime publike se teknologjia aliene po ruhej dhe studiohej në bazën supersekrete.
Raporti pretendonte se fushata e dezinformimit popullor ishte një përpjekje për të fshehur testet ushtarake, duke përfshirë avionët luftarakë stealth, raportoi Wall Street Journal.
“Zona 51”, zyrtarisht e themeluar në vitin 1955, mbeti kryesisht jashtë vëmendjes deri në vitin 1989, kur informatori Robert Lazar u shfaq në televizion.
Ai pretendoi se kishte punuar në një objekt të fshehtë pranë Groom Lake, të njohur si ‘S-4’, duke çmontuar anije kozmike alienësh, duke e forcuar akoma më shumë folklorin rreth “Zonës 51”.
Gjithashtu, raporti zbuloi se zyrtarë të lartë të Forcave Ajrore talleshin me komandantët e rinj duke i informuar ata për një projekt të rremë supersekret të quajtur ‘Yankee Blue’, i cili përfshinte supozimin e studimit të anijeve jashtëtokësore.
Pas informimit të rremë, rekrutëve u thuhej se do të përballeshin me burgim ose ekzekutim nëse nxirrnin informacione.
Detajet që konfirmonin se “Zona 51” shërbente si vend testimi për armët më të avancuara të Amerikës u zbuluan për herë të parë në një dokument të CIA-s të deklasifikuar në vitin 2013.
Raporti shpjegonte se gjatë Luftës së Ftohtë, baza e largët e Nevadës u përdor për të testuar avionë si aeroplani spiun U-2 dhe aeroplani zbulues A-12.
Pavarësisht këtyre fakteve, “Zona 51” ka evoluar që atëherë në një vatër të teorive konspirative për alienët, me thashetheme të vazhdueshme për UFO të rrëzuara dhe autopsi jashtëtokësore të fshehura pas gardheve të saj me tela me gjemba.
