Tashmë grabitjet nuk bëhen vetëm nga persona në moshë madhore por edhe nga fëmijë. I tillë është një rast i raportuar nga Policia e Durrësit e cila ka mundur të vërë në pranga një 14 vjeçar. I riu kishte vjedhur jo pak por 3180 euro në një dyqan mishi një ditë më parë.
Në momentin e arrestimit, 14 vjeçarit i është gjetur një sasi e parave të grabitura, një celular dhe një pistoletë.
NJOFTIMI I POLICISE:
Specialistët për Krimet në Komisariatin e Policisë Durrës, pas një pune hetimore intensive dhe të pandërprerë kanë bërë të mundur zbardhjen dhe dokumentimin e plotë të një vjedhje të ndodhur në lagjen Nr.18, duke ndaluar autorin e dyshuar, konkretisht shtetasin:
• E.D. 14 vjeç, banues në Durrës.
Ndalimi i tij u bë pasi: Më datë 07.11.2016, në lagjen Nr.18, Durrës në dyqanin e mishit në pronësi të shtetasit L.K. ka vjedhur 3 180 €.
Menjëherë Efektivat e Policisë Durrës nisën hetimet dhe në orët e para të ditës së sotme vunë në pranga autorin, ku gjatë kontrollit fizik të tij, iu gjetën dhe iu sekuestruan në cilësinë e provave materiale:
• një pjesë të parave të vjedhura, 1 500 €;
•një armë sportive tip pistoletë me mbishkrimin “Ekol Special”
•një telefon celular.
Materialet i kaluan Prokurorisë së Rrethit Gjyqësor Durrës për veprime të mëtejshme për veprat penale”Vjedhja”dhe”Prodhimi dhe mbajtja pa leje e armëve të gjuetisë dhe sportive”parashikuar në nenet 134 dhe 280 të Kodit Penal./java/a.k
