Duke menduar çfarë i duhej Agronit marrëveshja sekrete

Nga Mero Baze

Kuvendi i Shqipërisë do të miratonte sot një marrëveshje konfidenciale për një kredi që Shqipërisë i duhet për blerjen e armatimit për ushtrinë nga SHBA. Marrëveshja që do të miratohet ka një protokoll strikt të ruajtjes së sekretit dhe bazohet mbi një deklaratë të nënshkruar nga deputetët që e lexojnë, se nuk do ta shpërndajnë apo transmetojnë te të tjerët.

Agron Shehaj hyri në sallë, mori kopjen e marrëveshjes dhe vrapoi në korridor drejt zyrës së tij. Sekretarja e ndoqi në mënyrë të pazakontë me vrap; ai e shtyu dhe ajo u rrëzua nga shkallët.

Ngjante si një skenë e një të çmenduri që po arratisej nga spitali dhe nuk lejonte askënd ta ndalte.

Përse i duhej Agron Shehajt ta merrte marrëveshjen sekrete në zyrën e tij?

Mendimi i parë është se e ka fotografuar për të pasur një kopje, çka, nëse ka ndodhur, përbën një çështje që duhet hetuar. Duhet të hetohen telefoni i tij dhe çdo pajisje fotografike apo skanuese në zyrën e tij. Kjo për sa i përket anës fizike të problemit.

Por ajo që është e rëndë dhe e pashpjegueshme për njerëzit normalë është përse ishte aq i vendosur ta bënte këtë. Nuk ishte se e mori gabimisht, apo se e kishte në dorë dhe harroi ta kthente. E mori me forcë, vrapoi që të mos e kapnin, shtyu njerëzit që tentuan ta ndalonin dhe, në fund, u mbyll në zyrë me marrëveshjen. Pra kemi një vendim të vetëdijshëm për atë që po bënte.

Në këtë moment të gjithëve u shkon mendja te gjëra shumë të rënda. Ata që janë më të prirur ta shohin Agronin si njeri të agjencive kujtojnë se ai ka pasaportë italiane dhe mund të jetë agjent italian. Pastaj e përfytyrojnë duke i raportuar shërbimit sekret italian se çfarë po bën Shqipëria me SHBA-në.

Të tjerë mendojnë se, meqë Agroni ka shkuar një herë në Mar-a-Lago, te vila e Trumpit ku u gjetën dokumente sekrete amerikane që Trump i kishte marrë nga Shtëpia e Bardhë, mendon se duke bërë edhe ky të njëjtën gjë do të bëhet i famshëm dhe do t’i shkojë në sy Trumpit, që ta ftojë sërish në Mar-a-Lago, këtë herë pa lekë.

Të tjerë mund të mendojnë se Agroni, ngaqë zbulon korrupsion pas çdo biznesi, ka dashur të shohë kush mund ta fitojë tenderin e blerjes së armatimit dhe ta kapë i pari, që t’i tregojë se ai ja ka dhënë tenderin.

Mund të ketë edhe versione të tjera.

Mua, në fakt, më kujton një barcaletë me një budalla që e martuan me zor. Të nesërmen e pyetën se çfarë kishte bërë natën e parë me gruan.

– Hyra në dhomë, – tregoi ai. – Pastaj gruaja filloi të zhvisheshe. Hoqi fustanin, pastaj këmishën e natës. Në fund unë ia hoqa edhe të brendshmet.

– Po pastaj? – e pyetën të gjithë me kureshtje.

– Ia hoqa llastikun e brekëve dhe e futa në xhep, se nuk e kishte mendjen. Ishte shtrirë dhe kishte mbuluar kokën.