Analisti i njohur Arben Meçe, i ftuar në “Tirana Live” tha se procesi i zgjedhjes së kreut të ri të SPAK deri tani po zhvillohet brenda kuadrit ligjor, pavarësisht debateve për preferencat mbi emrat konkretë.
Ai theksoi se katër kandidatët kanë kaluar pengesën e parë, që është testi profesional. Gjatë diskutimit në studio, Meçe theksoi se personalisht do dëshironte që në krye të SPAK të zgjidhej një prokurore femër.
“Po zhvillohet ngjarja brenda ligjit. Në dhjetor përfundon mandati i Dumanit dhe bëhet përgatitja për zgjedhjen e kreut të ri të Prokurorisë së Posaçëm. Deri tani kapërcimin parë e kanë bërë katër veta. Të katër e kanë kaluar testin profesional. Personalisht unë do doja të ishte një femër. Ky është opinionin im, e përgjithshmja është se nuk ka humbje SPAK, kushdo që të zgjidhet. Ligji garanton garë transparente dhe të ndershme”, tha ai.
Ai theksoi se kreu i ri i SPAK duhet të vazhdojë ritmin që krijoi Altin Dumani, madje të rrisë veprimtarinë e tij cilësore në goditjen e paligjshmërisë.
“Lufta vazhdon, nuk ka sfidë. Të gjithë ata 20 prokurorë kanë çështje në dorë dhe i vijojnë ato. Nga të dhënat e deritanishme nuk kemi asnjë provë, që të ketë ndërhyrje të politikës në SPAK. SPAK është jashtë kontrollit.
Unë do të ishte i kënaqur, që ritmin me të cilën e futi Dumani, me atë ritëm të vazhdonte. Rënia e këtij ritmi do kishte pasoja, por duhet të shohim se me çfarë egoje do vijë kreu i ri i SPAK.
Është një makineri që është në punë 100% dhe tani debati është nëse do shkojë në 120% apo do bjerë në 90%. Mendoj se do kemi rritje të ritmit. Ajo që është shqetësues, është se ka një agresivitet nga SPAK sa lidhet me masën e arrestit me burg”, tha ai.
Këshilli i Lartë i Prokurorisë pasi shqyrtoi dokumentacionet vendosi që katër kandidatë si Adnan Xholi, Klodian Braho, Doloreza Musabelliu dhe Ervin Gogaj të vazhdojnë fazat e tjera të kësaj gare.
