Beteja sezonale mes Partizanit dhe Skënderbeut nuk vijon vetëm në fushat e blerta, pasi lufta më e ashpër është përqendruar te deklaratat mediatike të protagonistëve të dy klubeve.
Pas fitores me Flamurtarin, trajneri i Skënderbeut, Mirel Josa, ka gjetur kohë që të thumbojë edhe Partizanin, kur ai është pyetur për fitoren e të kuqve në Durrës. “Nuk më intereson rezultati i kundërshtarit. Partizani do t’i fitojë të gjitha takimet nga tani deri në fund të kampionatit, përveç javës së parafundit të kampionatit”, u shpreh trajneri i Skënderbeut për “News 24”.
Pas këtij prononcimi, i kontaktuar nga “Panorama Sport”, drejtori i të kuqve, Dritan Dervishi, ka pohuar se nuk e priste një reagim të tillë nga Josa, që sipas tij, paska filluar të bëjë fallxhorin. Në trajtë batute, Dervishi i kthen në këtë mënyrë thumbimin trajnerit të Skënderbeut:
“Kam respekt maksimal për Mirel Josën, për të shkuarën e tij si futbollist, si dhe për atë që ka treguar si trajner. Por më bën çudi fakti që edhe ai paska hyrë te grupi i personave që shikojnë apo parashikojnë të ardhmen. Meqë paska marrë rolin e fallxhorit, Josa bën mirë të na tregojë edhe sa do të rrojmë, apo të na tregojë ndonjë rezultat të saktë që të kapim skedina (qesh)”.
Replika me De Biasin
Trajneri i Kombëtares, Gianni De Biasi, nuk ishte i pranishëm në stadium për të ndjekur ndeshjen PartizaniSkënderbeu. Pas sfidës, drejtori Dervishi, përmes “Panorama Sport”, dha një këshillë për trajnerin italian të kuqezinjve, i cili dy ditë para sfidës kishte ardhur në Shqipëri për të marrë një medalje.
Gjithashtu, Dervishi shprehu mendimin e tij për listën e lojtarëve që do të grumbulloheshin për miqë- soret e marsit, ku shikohet një anashkalim i Superiores. Gjatë konferencës së djeshme, De Biasi i është përgjigjur kështu Dervishit: “Unë jam mësuar të mos i fus hundët në punët e të tjerëve dhe do doja ta bënin të njëjtën gjë edhe ndaj meje. Sikurse kombëtarja është e të gjithëve, e tifozëve shqiptarë, edhe Partizani është i tifozëve të vet.
Besoj se ushtrojmë pothuajse të njëjtin zanat, por bëjmë dy punë shumë të ndryshme nga njëri-tjetri”. Ndërsa ndeshjen në fjalë De Biasi pohoi se ka ndjekur në televizor, madje edhe e ka riparë. Pas përgjigjes së teknikut të Kombëtares ka ardhur edhe reagimi i drejtorit të Partizanit. “Në natyrën time, nuk e kam parim që të merrem punët e të tjerëve. Sa për dijeni, unë nuk ndërhyj as tek ekipet e akademisë, jo më të fus hundët siç thotë ai te puna e trajnerit të Kombëtares.
Si tifoz me pasaportë shqiptare i Kombëtares kam të drejtën time të them atë që mendoj. Pastaj jam edhe përfaqësues i një klubi shqiptar dhe më lind e drejta të mbroj imazhin e Kategorisë Superiore dhe futbollit shqiptar. Kam respekt maksimal për punën e De Biasit, por edhe ne kemi të drejtën demokratike të themi mendimin tonë.
Për këto ndeshje miqësore, Superiorja duhet të përfaqësohej më shumë. Lojtarë të tillë si Vila, Fejzullahu, Lilaj, Latifi dhe Salihi duhet të ishin prezentë. Nuk e di se çfarë duhet të bëjë më shumë Salihi, 40 gola në sezon. Mendimin tim e them edhe si ish-pjesëtar i FSHF-së, për zbulimin e talenteve.
Duka është një njeri që pranon këshilla. Prandaj kur presidenti pranon këshilla, mendoj se kam të drejtën si tifoz i Shqipërisë të shfaq mendimin tim”, tha Dervishi. S’ka nevojë për ftesë- Më pas drejtori i të kuqve është pyetur edhe për faktin se De Biasi ka pohuar dje se në Shqipëri nuk vjen vetëm për medalje, por sa herë i thërret presidenti për të ndjekur ndeshje.
“De Biasi ka pasaportë shqiptare dhe nuk ka nevojë për vizë, kështu që mund të vijë sa herë të dojë. Nuk ka nevojë për ftesë. Gjithsesi, nëse ai nuk i pranon këshillat, unë i kërkoj falje. Ka qenë thjesht një mendim i imi dhe jo ndërhyrje në punët e trajnerit të Kombëtares”, tha Dervishi.
BW
