Kryetari i Partisë Demokratike, Sali Berisha, mori pjesë në prezantimin e ekipit të ri drejtues të Departamentit Brain Gain në PD, ku vlerësoi kontributin e këtij departamenti në një nga periudhat më të vështira të partisë.
Berisha theksoi se Brain Gain, i drejtuar nga Andi Mustafaj, iu bashkua PD-së në momente kritike, duke u kthyer në një zë të fuqishëm për mbrojtjen e opozitës dhe trashëgimisë së partisë.
“Ky departament i themeluar dhe i drejtuar nga zoti Andi Mustafaj dhe bashkëpunëtorët e tij në këtë sallë, erdhi në PD në momentet më kritike të saj. Erdhi në PD si një kushtrim për t’i dalë zot një parimi themelor, një të drejte themelore për një komb të lirë, për të pasur opozitë. Erdhën pra në kohërat më të vështira. Çfarë i solli këta intelektualë, ekspertë, specialistë? I solli një zë për vendin e tyre. I solli gjithashtu edhe një vlerësim i madh për PD-në, e cila në trajektoren e saj kishte arritur transformime epokale në Shqipëri. Departamenti Brain Gain nuk qëndroi thjesht në fushën e parimeve dhe të doktrinës, por kaloi në veprime shumë të rëndësishme, të një rëndësie themelore për PD-në”, tha Berisha.
Sipas Berishës, nismat e këtij departamenti kanë qenë ndër më të rëndësishmet në historinë e PD-së, veçanërisht në mbrojtjen e simboleve dhe identitetit të saj përballë asaj që ai e quajti propagandë mashtruese kombëtare dhe ndërkombëtare.
“Nismat e këtij departamenti kanë qenë absolutisht nismat më themelore, më të rëndësishme të ndërmarra nga ndonjë departament në historinë e PD-së. Nisma e tyre ishte mbrojtja e trashëgimisë së kësaj partie në një kohë kur një propagandë mashtruese kombëtare dhe ndërkombëtare synonte copëtimin dhe shkatërrimin e saj. Secili prej tyre mund të kishte hequr dorë, të ishte integruar në një komb tjetër, aty ku jetonte, edhe nga simbolet, edhe nga trashëgimia, se do i duhej të përvetësonte trashëgiminë dhe simbolet e një kombi tjetër. Por jo. Këta erdhën me nismën e simboleve, simbolikave, në kohë të mjegullt. Ky departament me një vizion të qartë dhe me një mençuri, këmbëngulje, e shndërroi këtë seli si kurrë ndonjëherë më parë në një seli veprimtarish kulturore të shumta. Mbrojti nëpërmjet kulturës imazhin e PD-së”, tha Berisha.
Nga ana tjetër, Berisha pranoi se PD nuk ka qenë mjaftueshëm e hapur për integrimin e plotë të anëtarëve të Brain Gain dhe përfaqësuesve të diasporës, duke theksuar se shumë prej tyre nuk kanë marrë vendet që meritonin në forumet e partisë. Ai e cilësoi këtë si një problem themelor që duhet zgjidhur sa më parë përmes garancive statutore.
“Duhet të pranojmë, PD ka një problem themelor ndaj këtij departamenti, por edhe ndaj diasporës, të cilit duhet t’i japë përgjigje sa më parë. Nuk është parti vetëm e degëve të saj në Lezhë, Durrës apo Peqin, por është edhe parti e degëve të saj në Athinë, Milano, Paris dhe vende të tjera. Në këtë kontekst është e domosdoshme që këto mangësi të marrin përgjigje statusore. Nuk duhet të jenë zgjidhjet çështjet e vullnetit të kryetarit apo kryesisë të partisë, zgjidhjet duhet të jenë garanci statutore. Dhe në këtë kuadër ne i japim përgjigjen më të mirë, korrigjojmë padrejtësinë që është bërë ndaj tyre, por edhe ndaj diasporës. Dhe kjo padrejtësi duhet të finalizohet me përcaktime të qarta në statutin e partisë”, tha ai.
