Vrasja makabre e Liridona Ademajt më 29 nëntor 2023, një ngjarje që tronditi mbarë opinionin shqiptar, ka marrë goditjen e parë nga drejtësia. Gjykata Themelore në Prishtinë, nën drejtimin e gjyqtares Fatime Dermaku, ka shpallur fajtorë autorët e këtij krimi të organizuar. Gjykata vërtetoi se Naim Murseli, bashkëshorti i viktimës, ishte “arkitekti” i vrasjes së nënës së dy fëmijëve të tij. Ai u dënua me burgim të përjetshëm për planifikimin dhe organizimin e vrasjes. Po kaq dhe Granit Plava, ekzekutori i krimit. Ndërsa bashkëpunëtori Kushtrim Kokalla është dënuar me 30 vite burgim.
Në një intervistë për emisionin “Në Radio” me Andri Xhahun në Radio Tirana, eksperti i sigurisë në Kosovë, Bedri Elezi, e konsideroi këtë një hap vendimtar për drejtësinë kosovare. “Ky është vendimi i dytë pas rastit të Marigona Osmanit ku jepet burgim i përjetshëm. Është një aktgjykim i guximshëm dhe shumë i pritur nga opinioni kosovar dhe mbarë shqiptaria”, u shpreh Elezi.
Sipas tij, këto vendime shërbejnë si një barrierë ndaj degradimit të sigurisë publike. “Këto janë mesazhe të qarta se do të ketë zero tolerancë. Gjykatat duhet të jenë të ashpra që t’u jepet një mësim personave që merren me vepra të rënda”.
Elezi vuri në dukje se, megjithëse vendimi është për t’u përshëndetur, mbetet për t’u parë se si janë renditur provat në pjesën e arsyetimit, pasi Granit Plava ka mohuar se ishte ai që tërhoqi këmbëzën, ndonëse pranoi urdhrin e Murselit.
Eksperti Elezi analizoi gjithashtu profilin psikologjik të Naim Murselit, duke e cilësuar si rastin më interesant dhe më rrëqethës të parë deri më tani. “Ai ka porositur vrasjen, ndërsa ka marrë pjesë edhe vetë në të. Gjatë gjithë seancave ka tentuar të njollosë Liridonën dhe familjen e saj, e të kthehet në viktimë. Pjesëmarrja e tij në varrim dhe ngushëllim tregon një kriminel kaq të ftohtë që të kujton shprehjen popullore: ‘Të vrasin natën, e të qajnë ditën’”.
Për shkak të rrezikshmërisë dhe ndjeshmërisë së rastit, Murseli pritet të vuajë dënimin në një burg të sigurisë së lartë nën masa të rrepta survejimi, edhe për të parandaluar ndonjë tentativë të mundshme vetëvrasjeje.
Për familjen Ademaj, ky vendim nuk e kthen Liridonën, por ofron një lloj paqeje shpirtërore. Leonard Ademaj, vëllai i viktimës, i cili është kthyer në simbolin e betejës për drejtësi, deklaroi se ky vendim shkon për Liridonën dhe fëmijët e saj. “Sadopak na ka lehtësuar dhimbjen. Duhet të jetë një mësim për të gjithë ata që mundohen të bëjnë një krim të tillë”.
Bedri Elezi vlerësoi lart figurën e Leonardit, duke theksuar se “te shqiptarët pika e dobët ka qenë gjithmonë motra” dhe se angazhimi i tij tregon rëndësinë e bashkëpunimit të familjes me organet e drejtësisë.
Pavarësisht dënimit maksimal, eksperti bën thirrje që shteti të fokusohet te parandalimi. Rasti i Marigona Osmanit, ku autori kishte 100 vepra penale të mëparshme, dhe vrasjet e fundit brenda familjes në Kosovë, dëshmojnë se institucionet duhet të reagojnë që në sinjalet e para të dhunës. Sipas Elezit, duhet të ketë bashkëpunim më të ngushtë Polici-Prokurori-Gjykatë, fushata mediatike dhe edukim në institucionet arsimore.
