Reforma në Drejtësi, zbatimi i saj dhe plotësimi i organeve të reja ka qenë tema e debateve në emisionin Java në RTSH ku kryetari i komisionit të ligjeve, Ulsi Manja tha se synimi i mazhorancës është t’u japë shqiptarëve drejtësinë që presin. Përballë analistit Prec Zogaj, Manja tha se duhet punë për pavarësinë e sistemit.
“Ajo që presim është që sistemi i drejtësisë të ecë me këmbët e veta. Por nuk duhet të harrojmë se kundërshtarët e reformës janë ende këtu, në Shqipëri. Synimi i marzhorancës sot është që t’u japë shqiptarëve drejtësinë që kanë pritur. Ndërkohë që për pavarësinë e sistemit duhet punuar pa pushim” – tha Manja.
Deputeti socialist shtoi se Vetingu dhe SPAK-u janë risi për drejtësinë. Ai u shpreh se shqiptarët kanë nevojë për efekte të matëshme të reformës.
Ndërsa avokat Spartak Ngjela tha se shqiptarët nuk besojnë se krerët e korruptuar do të shkojnë para drejtësisë.
“Nuk duhet harruar se mbushja e SPAK ka ardhur nga Vetingu. Populli ka krijuar një urrejtje të madhe për sistemin e vjetër.Shqiptarët ende nuk besojnë se krerët e korruptuar do të shkojnë para drejtësisë një ditë. I gjithë problem është me pronat që kanë krijuar ndër vite. Nuk ndodh në Perëndim që një zyrtar i lartë të vejë prona duke qenë në detyrë. Këtu janë vënë prona duke qenë ‘mbret’” – tha Ngjela.
Ai shtoi se në vendin tonë gjyqtarët dhe prokurorët ishin mësuar të talleshin me ligjin.
