Udhëtimi i Cassie-t, amerikanes 27-vjeçare do të përmbyllet në janar në Izrael dhe Palestinë. Ka nisur të vizitojë planetin në korrik 2015
Ka filluar udhëtimin e saj në botë për të promovuar paqen me një turizëm të pranueshëm: takon studentë dhe politikanë, filmon njerëz dhe vende për të xhiruar një dokumentar mbi planetin tonë, mbi etnitë, mbi popujt, njeh dhe përballet me kultura të ndryshme, raca, besime. Cassie De Pecol, 27 vjeçe, amerikane, është nisur nga Konektikati (SHBA) për të vizituar të gjithë botën.
Ka kaluar më shumë se tre vite me valixhe gjithnjë në duar, duke udhëtuar në pesë kontinente, në një projekt të quajtur “Expedition 196” (numri i vendeve të shkelura). Itinerari i gjatë i Cassie-t do të përmbyllet pas më pak se një muaji: i mungojnë gjashtë vende për të realizuar objektivin. Shteti i fundit ku ka shkelur ka qenë Pakistani dhe do ta mbyllë turin e saj në janar në Palestinë dhe në Izrael.
Nga korriku 2015, muaji i nisjes së aventurës, deri më sot, bjondia amerikane punon për “International institute of Peace through tourism”, në një udhëtim thuajse të paguar tërësisht nga sponsorët që e mbështesin përmes rrjeteve sociale në internet. Nga ata janë paguar thuajse 200 mijë dollarët që kanë shërbyer për këtë përvojë, përfshirë udhëtimet me 250 avionë, shkruan shqip.
Entuziazëm, shumë kuriozitet dhe një dozë e mirë gjendjeje shpirtërore për këtë aventuriere të pasionuar, e cila ka mbërritur thuajse një hap larg përfundimit të projektit të saj. Vajza ka shumë kujtime për të ndarë dhe mjaft paragjykime për të sheshuar: “Të gjitha gjërat e këqija që dëgjojmë për myslimanët, – siguron Cassie, – janë larg realitetit. Në Afganistan, Oman, Jordani, Iran, jam pritur me zemër nga njerëzit atje, të cilët mezi prisnin që të më njihnin me kulturën e tyre”. Në vendet e Lindjes së Mesme, është ndier gjithnjë e qetë, nuk ka pasur asnjëherë frikë. Por nuk ka ndodhur kështu në shumë vende të Afrikës Qendrore dhe as në Lima (Peru), ku thotë se është grabitur në një taksi.
Nga Somalia, ajo që ka prekur Cassie-n ka qenë “mikpritja mbresëlënëse e njerëzve” dhe e udhëtimit mbi “Rock Island” të Palau në “mrekullinë e lirisë”.
Kur të ketë plotësuar udhëtimin e saj, do të jetë ajo udhëtarja numër një rekordmene në botë. Vendi i parë deri tani mbahet nga amerikania Yili Liu, e cila ka hyrë në librin “Guinness” në dhjetor 2010, pasi kishte udhëtuar për 3 vjet, 3 muaj dhe 6 ditë, duke vizituar 194 vende të ndryshme.
Në vitin 2013, Eric Hill, 30 vjeç, ishte nisur për të thyer rekordin, duke bërë xhiro në botë në më pak se 1.200 ditë. Por Eric vdes gjatë një zbritjeje të gabuar me parashutë. Ndërkohë Cassie e ka nisur aventurën e saj për të realizuar projektin e madh të Eric. Dhe ajo ëndërr po bëhet realitet./a.k
