Tashmë që projektligji për rivlerësimin e pronave është nxjerrë për konsultim publik, Shoqata e Pasurive të Paluajtshme propozon disa ndryshime.
Sipas drejtorit të NAREA-s, Reinaldo Pipiria, tatimi i të ardhurave nga shitja të vendoset 3%, ndërsa për të gjitha tipologjitë e tjera të jetë 5%.
“Për strehimin ne sugjerojmë shumë që të jetë 3 për qind dhe për çdo pronë tjetër të jetë 5 për qind. Pse 3 për qind? Për shkak se ne besojmë që 3-përqindëshi ka funksionuar më së miri në fushatën e fundit të rivlerësimit 2020 dhe mes-2022. Kemi parë që të gjitha palët kanë përfituar kur ka qenë 3 për qind, sidoqoftë; blerësit për herë të parë apo ata të cilët rilokoheshin, pra, shisnin banesën e tyre dhe vendosnin të shkonin në një banesë më të madhe. Në të njëjtën kohë edhe shteti ka përfituar, për shkak se ka arkëtuar mesatarisht 35 deri 40 milionë euro në vit,” shprehet z. Pipiria.
Për të lehtësuar strehimin, Shoqata ka një propozim edhe për sa i përket blerësve për herë të parë.
“Në shumicën e vendeve ka një lehtësim, një përjashtim nga taksat kur bëhet fjalë për blerësit për herë të parë, për banesën kryesore dhe për pronësinë afatgjatë. Kështu dekurajohet spekulimi në treg sa më gjatë ta mbash pronën, sidomos nëse është rezidencë kryesore, sidomos nëse ti je blerësi i parë. Të gjitha këto vijnë të atashuara me lehtësi fiskale,” shton z. Pipiria.
Duke u bazuar tek përvoja e viteve të mëparshme, Shoqata e shikon si të pamjaftueshme periudhën 9-mujore për rivlerësim dhe kërkon që kjo kohë të jetë të paktën 12 muaj.
