Ministria e Financave shumë shpejt do të paraqesë në qeveri për miratim, një paketë ligjore përmes së cilës parashikohet falja e disa gjobave për biznesin.
Sipas draftit të hartuar nga ministria e Financave, dhe që është konsultuar edhe me Fondin Monetar Ndërkombëtar, falen gjobat automatike të sistemit për deklarimin e sigurimeve, për mungesën e kasave, ndërsa vetëm detyrimet deri në 2010 mund të fshihen.
Parashikohet të falen gjobat për deklarim të vonuar prej 10 mijë lekësh të administratorëve dhe punonjësve, që u vunë masivisht në 22 qershor të këtij viti, pas përditësimit të sistemit e-tax.
Drati parashikon gjithashtu që ti falet gjoba për periudhën 1 janar 2011-31 dhjetor 2014 të gjithë atyre që paguajnë principalin. Ministri i Financave Arben Ahmetaj deklaroi të martën gjatë një konference për shtyp se nuk ka falje të principalit për periudhën 2011-2014. “Dua të ndaj me sipërmarrjen faktin se nuk ka falje për periudhën 1 janar 2011 -31 dhjetor 2014. Kush paguan principalin i falet gjoba, tjetër gjë nuk ka”, deklaroi ai.
Ministria e Financave ka përfshirë në draft edhe gjobat për kasat fiskale. Ahmetaj paralajmëroi se po bëhet një skanim i kompanive të mëdha, pasi shumë prej tyre kanë abuzuar e niptet dytësore të tyre duke i shkaktuar shtetit humbje të TVSH dhe dëm buxhetit të shtetit./a.m.
