Draft-rezoluta për Shqipërinë është hartuar nga raportuesi Knut Fleckenstein me nota shumë pozitive. Ai inkurajon Komisionin Evropian për të paraqitur raportin e ndërmjetëm me synimin e hapjes së negociatave të anëtarësimit për Shqipërinë, sapo të miratohet reforma në drejtësi. Një çështje kjo që mbizotëron në 6 faqet e dokumentit dhe përbën dhe Amendamentin e parë mbi tekst me propozim të vetë hartuesit social-demokrat, edhe me pëlqimin e PPE-së, që pa nisur shqyrtimi në Komitetin e Jashtëm të Parlamentit Evropian.
Me “keqardhje”, draft-rezoluta vëren “debatin e pakuptimtë” dhe “mungesën e frymës së bashkëpunimit dhe kompromisit tek delegacioni shqiptar” të vërejtur gjatë takimit të fundit ndërparlamentar. Ndërsa vlerësohet miratimi i ligjit të ashtuquajtur “për dekriminalizimin” dhe marrja e disa masave nga Tirana, në dokument “mbetet shqetësimi për korrupsionin e përhapur, veçanërisht në arsim, shëndetësi, gjyqësor, prokurim publik, qeverisjen lokale”.
Për numrin e ulët të dënimeve autoriteteve vendase u kërkohet një ligj “për mbrojtjen e informatorëve” dhe përmirësimin e dëshmive mbi “hetimet, ndjekjet e dënimet në të gjitha nivelet” për rastet e korrupsionit, por dhe të krimit të organizuar.
Përsëriten gjetjet e raportit të Komisionit mbi zgjedhjet lokale të 2015-s, lirinë e medias (AMA e TVSH),ekonominë, zbatimin e të drejtave themelore, veçanërisht për minoritetet dhe grupet vulnerabël të shoqërisë, si dhe zgjidhjen e çështjes së pronave.
Ai njeh rolin konstruktiv të Shqipërisë në rajon, duke u ndalur te dialogu ndërfetar në vend. Draft-rezoluta e PE-së vëren me shqetësim se “Shqipëria është e prekur nga fenomeni i luftëtarëve të huaj dhe radikalëve islamik”. Komiteti i jashtëm pret amendimet e eurodeputetëve deri më datë 25 shkurt.
