Rafael Benitez ka mbushur një muaj pas shkarkimit nga posti i trajnerit të Real Madridit. Dhe, nga ajo kohë nuk ka folur publikisht, dhe është parë shumë pak. Ai është duke kaluar kohë me familjen, nga e cila ka qëndruar larg për dy vjet, dhe po shikon shumë futboll, nga 20 ndeshje në javë. Një muaj, kaq kanë kaluar nga dita e shkarkimit të Rafael Benitezit nga posti i trajnerit të Real Madridit, dhe zëvendësimit të tij me Zinedine Zidane. Benitez nuk e ka hapur gojën, asnjëherë, së paku zyrtarisht. Ai nuk ka thënë asgjë, përveç se ndoshta në ndonjë bisedë me ndonjë shok që e ka telefonuar pas largimit nga Santiago Bernabeu. Intervista? Jo, faleminderit. Deklaratë publike? Jo faleminderit. Asnjë koment. Por, çfarë ka bërë Benitez gjatë kësaj kohe? E përditshmja sportive madrilene “Marca” e ka ndjekur nga afër.
Dy vjet larg familjes
Në realitet, të gjitha ato që nuk ka qenë në gjendje t’i bënte në dy vitet e fundit, duke jetuar larg gruas së tij, Montse, dhe dy vajzave, Claudia (17 vjeçe), Agata (13), dhe katër qenve, Red, Goofy, Honey dhe Clem. Benitez është një prind me plot kuptimin e fjalës, i dërgon vajzat në shkollë, i pret ato, hanë së bashku, i kryejnë detyrat dhe i shoqëron në qytet. Kurse, në kohën e lirë qëndron pranë gruas së tij, dhe shikon futboll në televizion, hiç më pak se 20 ndeshje në javë. Ekipe, futbollistë, rreshtime taktike, thjesht analiza që mund t’i shërbejnë për të ardhmen.
Ditët e fundit, një kujtim i keq
Ditët e para pas largimit nga posti i trajnerit të Real Madridit kanë qenë shumë të këqija, në fakt të tmerrshme. Në 48 orët e para ai nuk iu përgjigj askujt në telefon, ishte i thyer. Kur shkoi në qendrën sportive më 5 janar për të mbledhur gjësendet e tij, ato nuk ishin aty. Dhe, në zyrën që i takonte atij shkruante një emër tjetër, Zidane, i cili udhëhoqi seancën e parë të mëngjesit. Presidenti i “Los Blancos”, Florentino Perez, dhe drejtori i përgjithshëm, Jose Angel Sanchez, ishte po ashtu në Valdebebas, por nuk u takuan me të. Nuk ndodhi një lamtumirë zyrtare.
Ofertat për detyrën e re
Për aq pak sa është paraqitur në publik, Benitez ishte prezent vetëm në një ndeshje. Ai u pa në Anfield duke ndjekur ballafaqimin mes Liverpoolit dhe Arsenalit. Dhe, ai nuk deshi të krijonte spekulime pasi përcolli ndeshjen mes dy skuadrave që nuk kanë trajnerët në diskutim. Në 30 ditët e fundit, Benitez ka marrë oferta nga më të ndryshme, por asnjëra prej tyre nuk i ka mbushur mendjen se bëhet fjalë për një projekt interesant. Kina, Emiratet e Bashkuara Arabe, Katari, janë disa destinacione që i kanë bërë thirrje atij që të fillojë detyrën e re. Por, ai ka vendosur të presë, jo domosdoshmërisht deri në sezonin e ri. Nëse merr ndonjë ofertë që i pëlqen, Benitez mund të nënshkruajë sot, ose nesër.
