Gjatë një bashkëbisedimi ‘online’ me shoqërinë civile, duke folur për rëndësinë e zgjedhjeve parlamentare të 25 prillit, Ilir Meta i ka dërguar një mesazh edhe Prokurorisë së Posaçme kundër Krimit dhe Korrupsionit.
Ai iu drejtua SPAK-ut, duke thënë se me “cironkat” e dosjes së Dibrës dhe Shijakut nuk tremben ata që kanë ndërmend të vënë dorë mbi procesin zgjedhor të 25 prillit.
“Çështja e zgjedhjeve është tashmë një çështje e të gjithë shoqërisë, sepse prej saj varet edhe integrimi i Shqipërisë. Vota duhet të jetë njëherë e përgjithmonë e shenjtë dhe e barabartë, – tha Meta. – Ne do t’i mbështesim të gjitha institucionet të bëjnë detyrën në këtë drejtim, përfshi edhe SPAK-un. Por me “cironkat” e dosjes së Dibrës dhe Shijakut, nuk trembet asnjë nga ata që kanë ndërmend të venë dorë mbi procesin zgjedhor” – tha ai.
Meta përsëriti edhe një herë se është i gatshëm të japë dorëheqjen e tij nga posti i presidentit nëse mazhoranca aktuale fiton me ndershmëri dhe vota jo të blera.
/a.r
