Ditën e djeshme Ish kryeministri Berisha hodhi akuza drejt Edi Ramës, i cili sipas tij i kishte dhënë urdhër Emiliano Shullazit për të kërcënuar profesor Mynyr Konin, që ky i funidt të tërhiqej nga gara për Universitetin e Tiranës.
Në orët e vona të mbëmjes Emiliano Shullazi u arrestua e së bashku me të në pranga përfundoi edhe kushëriri i tij Blerim Shullazi si dhe krahu i djathtë Gilmando Dani.
Urdhër-arresti u lëshua pas takimit të kryeprokurorit Adriatik Llalla me kreun e Policisë Haki Cako e kreun e prokurorisë së Tiranës, Petrit Fusha.
Arrestimi i këtyre tre personave është bërë në rrugën e Kavajës. Prokuroria e Krimeve të Rënda, e cila lëshoi dhe mandatin e arrestit, dyshon se këta trë persona kanë kryer një sërë veprash penale.
Policia ka pyetur Shullazin si dhe ka sekuestruar disa aparate telefonike
Gjatë marjes në pyetje Emiliano Shullazi i ka mohuar akuzat e bëra nga Ish kryeministri Berisha, ndërsa policia ka kryer një sërë kontrollesh në disa banesa në rrugën e Kavajës, ku janë sekuestruar disa aparate telefonike që pritet të verifikohen nëse kanë dërguar sms kërcënuese ose jo në adresë të profesorit Mynyr Koni.
Akuzat ndaj Shullazit
1.Shtrëngimi me anë të kanosjes ose dhunës për dhënien e pasurisë
2.Shkatërrim i pronës me eksploziv
3.Prodhimi dhe mbajtja pa leje e armëve luftarake dhe e municionit
4.Grup i strukturuar kriminal
Kush eshte Emiljano Shullazi?
Ky nuk është rasti i parë që Emiljano Shullazi përmendet nga ish-kryeministri Berisha për kërcënime. Pak kohë më parë, Shullazi u përmend nga Berisha se kishte kërcënuar në një lokal ish-deputeten e PD Voltana Ademi, sot kryebashkiake e Shkodrës. Sipas Berishës, veç Ademit, Shullazi kërcënoi dhe kreun e opozitës Lulzim Basha, ndaj të cilit në atë periudhë u shtuan masat e sigurisë.
Për kërcënimin e Ademit dhe Bashës, Prokuroria e Krimeve të Rënda nisi hetimet, por vetëm disa muaj verifikime dhe hetimet janë pushuar nga prokuroria.
Në Prokurorinë e Krimeve të Rënda, ish-deputetja deputetja e PD Voltana Ademi ka deklaruar se ndodhej në ambjentet e një lokali nën shoqërinë e një shoqes së saj, në momentin kur Emiljano Shullazi sipas saj i ka deklaruar: ”…jam Emiljano Shullazi dhe kam një mesazh.I thuaj kryetarit të mos flasë shumë për mua, se do i ketë punët keq. Të mos më përmendë më emrin…”, shkruan Report Tv.
Në fakt ky mesazh është “transportuar” menjëherë nga ish-deputetja Ademi në veshin e kreut të PD Lulzim Basha, i cili në 9 janar 2015 urdhëroi të nxirte Arben Ristanin në konferencë shtypi, duke pohuar se kryeopozitari ishte kërcënuar nga Shullazi dhe se ndihej realisht i kërcënuar.
Njoftimi zyrtar i Policisë, Si u bë arrestimi i Shullazit
Burime zyrtare nga policia bëjnë të ditur se është ekzekutuar urdhri i ndalimit i Prokurorisë së Krimeve të Rënda Tiranë për ndalimin e tre shtetasve për veprën penale të “Shkatërrimit të pronës me eksploziv”, ndaj shtetasit A. Z., me qëllim kanosjen e tij për fitimin e pasurisë në mënyrë të padrejtë.
Më datë 17.04.2016, në orën 01:30, u bë ndalimi i shtetasve:
- Emiljano Shullazi, 38 vjeç, banues në Tiranë.
- Gilmando Dani, 38 vjeç, banues në Tiranë.
- Blerim Shullazi, 32 vjeç, banues në Krujë.
Ndalimi i këtyre shtetasve është bërë sepse në bashkëpunim me njëri-tjetrin dhe me persona të tjerë në kohë dhe qytete të ndryshme, kanë shtrënguar nëpërmjet kanosjes për dhënien e pasurisë në mënyrë të padrejtë biznesmenë të ndryshëm.
Prokuroria për Krimet e Rënda Tiranë, për tre shtetasit e sipërpërmendur, ka regjistruar një sërë procedimesh penale për veprat penale “Shtrëngimi me anë të kanosjes ose dhunës për dhënien e pasurisë”, “Shkatërrim i pronës me eksploziv”, “Prodhimi dhe mbajtja pa leje e armëve luftarake dhe e municionit” dhe “Grup i strukturuar kriminal”, parashikuar nga Nenet 109/b, 152, 278/4, 283/a dhe 333/a Kodit Penal.
